Lugrís e as súas paredes soñadas

Abanca inaugura o 31 de marzo unha exposición con máis dun centenar de murais de Urbano Lugrís, xusto cando remata a rehabilitación da obra 'Vista de A Coruña, 1669', que está nas súas oficinas da rúa Olmos

15.03.2017 | 11:44
Retablo de Lugrís realizado para o Instituto de Cultura Hispánica de Madrid.

Máis dun cento de obras, algunhas delas que nunca foran expostas e outras que se volverán reunir para lucir tal e como o pintor galego Urbano Lugrís, na súa faceta de muralista, as pensara. Abanca inaugurará o 31 de marzo a exposición 'Lugrís, paredes soñadas', na sede de Afundación, xusto cando remata a rehabilitación do mural 'Visita de A Coruña, 1669', que está desde o mes de agosto na rúa Olmos e que se poderá visitar en horario comercial permanentemente. A mostra rematará o 2 de setembro e nela poderán verse desde proxectos que non se realizaron, como o deseño para unha igrexa en San Pedro de Visma, como unha celosía para unha vivenda da Coruña ou o gran mural que pintou para o Sanatorio Álvarez, de Santiago

A obra de Lugrís como nunca antes estivo. Xunta. Lonxe de humidades. Como se o tempo deixase de correr. Así amosará Abanca a primeira exposición sobre o Urbano Lugrís muralista, con máis dun cento de obras, algunhas delas que nunca foran exhibidas antes, que pertencen a coleccións particulares e outras que nunca chegaron a se faceren realidade, como o proxecto que o artista debuxou para a igrexa de San Pedro, no barrio de Visma, e outras que voltan ao seu lugar de orixe, como as pezas que se mostrarán procedentes dunha barbería, recreando a súa disposición orixinal.

A inauguración desta exhibición, Lugrís, paredes soñadas, coincidirá co remate dos labores de restauración de Vista de A Coruña 1669 -o mural que estaba no antigo Vecchio e que agora está na oficina central de Abanca, na rúa Olmos-. Será o 31 de marzo.

A mostra está comisariada polo estudoso da obra de Lugrís Rubén Ventureira e poderase visitar até o 2 de setembro, na sede de Afundación, no Cantón Grande.

Con esta obra, afóndase por primeira vez na obra do Urbano Lugrís muralista, o que encheu de cores e paisaxes, de estrelas e barcos institucións públicas e privadas. Entre as obras que se poderán ver están tamén o óleo Stella Maris, que Lugrís fixo para a Confraría de Pontedeume, e os vidros decorativos dunha celosía deseñados para unha vivenda da Coruña, así como o gran mural que pintou no Sanatorio Álvarez, de Compostela.

Volverá, a partir do 31 de marzo, Vista de A Coruña 1669 ao centro neurálxico do Lugrís muralista, á rúa Olmos, moi preto do lugar para o que foi concebido, a sede do Banco Hispano-Suízo; preto tamén da obra que o arquitecto e presidente de O Mural, a asociación que promoveu a declaración do mural como Ben de Interese Cultural, Marcos Samaniego, calificou neste diario como a " Capela Sixtina de Lugrís", que é o mural que hai nun restaurante da mesma rúa, na que a pintura vai máis alá das paredes e chega ao teito abovedado. Está tamén moi preto a obra da rúa Álvaro Cebreiro, unha peza case descoñecida, xa que está nun primeiro andar e coa que a choiva non tivo piedade.

Abanca destaca que nesta mostra haberá 106 pezas e que "grazas á colaboración con outras organizacións conseguiuse tamén reunir obras cunha orixe común que se atopan na actualidade en diferentes localizacións". É unha homenaxe ao Lugrís muralista, ao home que enchía de cor as paredes, que as deixaba, cos seus pinceles, tal e como el os soñara.

Compartir en Twitter
Compartir en Facebook

GALICIA EN VINOS

Galicia en Vinos

Todos los vinos de Galicia

Consulta aquí todos los vinos de las cinco denominaciones de origen de Galicia
 


ESPECIAL

PREMIOS OPINIÓN MÚSICA RAÍZ

Premios Opinión da Música de Raíz

Consulta aquí a información dos premios de música do noso diario


Enlaces recomendados: Premios Cine