Unión Coruñesa solicita a modificación do topónimo

O presidente da Unión Coruñesa, Carlos Marcos, criticou a "cerimonia da confusión" que levaron a cabo as distintas forzas políticas no Pleno do Concello da Coruña

EFE Unión Coruñesa presentou hoxe, no rexistro do Parlamento galego, unha Iniciativa Lexislativa Popular (ILP) para solicitar a modificación do artigo 10 da Lei de normalización lingüística e que recolla que os topónimos de Galicia -incluído o da Coruña- poidan ser utilizados oficialmente en calquera das dúas linguas cooficiais.

O presidente de Unión Coruñesa, Carlos Marcos, informou hoxe nunha rolda de prensa de que a ILP que propugnan non incorre en ningunha das catro razóns de non admisión que prevé o Parlamento e considerou a iniciativa como "un paso importante para a cidade coruñesa e un paso fundamental para a verdade".

Neste sentido, Marcos criticou a "cerimonia da confusión absolutamente insoportable" que levaron a cabo as distintas forzas políticas no Pleno do Concello da Coruña e na Cámara autonómica, ao tempo que lles lembrou que a cidadanía "non soporta que isto se estire coma un chicle".

Carlos Marcos incidiu en que se trata dunha iniciativa "aberta", cuxo único obxectivo é que se debata a cooficialidade do topónimo, "independentemente de quen a leve", e comprometeuse a retirala se o voceiro municipal do PP e deputado autonómico, Carlos Negreira, a presenta no Parlamento "tal e como se comprometeu".

Unha vez presentada a Iniciativa Lexislativa Popular, o Parlamento galego dispón dun mes para contestar, tralo cal ten que trasladar o informe á Xunta Electoral, que será quen habilite as follas das sinaturas legais.

Abrirase entón un prazo de catro meses para a recollida de sinaturas, no que o presidente de Unión Coruñesa confiou en acadar 50.000 rúbricas -necesítanse 19.000 para ser admitida a trámite- e sinalou a febreiro ou marzo como datas "desexables" para fixar a data do pleno no que se debaterá a proposta.

O obxectivo de Carlos Marcos é chegar ás próximas eleccións municipais, que se realizarán no 2011, "coas cousas claras" e poñer "no lugar onde se debe debater" a cuestión de fondo, que é a cooficialidade do topónimo coruñés, como desexan "a maioría" dos cidadáns.

Ademais, o representante de Unión Coruñesa considerou que non se trata dunha cuestión menor, xa que, afirmou, o debate sobre o topónimo "foi a única cuestión que puxo en dúbida a estabilidade do Goberno municipal".