O escritor Fernando Díaz-Castroverde Gómez recibiu onte na sede da Fundación Paideia o galardón de narrativa breve Repsol, dotado cun premio de 9.000 euros, e a publicación do volume, que se presentou no mesmo acto. O autor logrou o galardón, que este ano chega a súa quinta edición, co libro Microbios e outros paquidermos, no que o escritor, cunha ampla traxectoria na poesía, experimenta co xénero do microrrelato.
Na entrega do premio estiveron presentes, ademais do gañador, o conselleiro de Educación e Ordenación Universitaria, Jesús Vázquez; o vicepresidente da Fundación Repsol, César Gallo; e o director xeral da editorial Galaxia, Víctor F. Freixanes.
Fernando Díaz-Castroverde gañou o quinto concurso de narrativa breve Repsol por diante doutras 38 obras presentadas, e o xurado destacou Microbios e outros paquidermos polo seu mordaz humor e por ser "un libro harmonioso relacionado cos aforismos".
