Alberte Fernández Presidente da asociación de veciños Atochas-Monte Alto-Torre de Hércules

"A día de hoxe aínda se pode obrar na canteira de Durmideiras"

"Agardamos que haxa unanimidade, xa que parece que todas as forzas están a favor dun cambio para protexer este espazo"

05.10.2015 | 17:27
Alberte Fernández.

O presidente da asociación de veciños Atochas-Monte Alto-Torre de Hércules, Alberte Fernández Mariño, falará hoxe no pleno desde o escano cidadán. Tres anos atrás, o 6 de agosto do 2012, foi desaloxado pola Policía Local dese mesmo salón, xunto con outros veciños, por protestar polo traslado da eficabilidade da canteira de Santo Amaro a Durmideiras.

-Por que solicitou poder intervir no pleno e que vai dicir na sesión de hoxe?

-O que vou dicir é o mesmo que o que quixemos dicir aquela vez que nos botaron do pleno do 2012. A día de hoxe aínda se pode construír nesta parcela. O feito de que o anterior Goberno local dixese que non se ía facer, dá pé a que, se se deixa a posibilidade aberta, agora non, e o día de mañá tampouco, pero igual dentro duns anos, alguén queira construír nese lugar, e creo que iso hai que modificalo. O de falar nos plenos é algo que xa existía noutros concellos máis pequenos ca Coruña.

-Levará só este punto, ou aproveitará para facer outras reclamacións?

-Levaremos melloras para o barrio de Durmideiras, como na pista deportiva ou no mercado, que queremos que sexan consensuadas coa xente que traballa alí, e a dinamización do parque da praza Galatea, porque non é un lugar ao que vaian moito os veciños, podería ter xogos para nenos con necesidades especiais. Pediremos tamén que os maiores teñan un sitio no que estar ao longo do día e que se peche pola noite. Era unha das nosas demandas históricas. Levaremos tamén o tema duns talleres que hai na zona, que levamos xa moito tempo reclamando que desaparezan. E melloras tamén para a Agra de Santo Amaro porque, aínda que sempre nos opuxemos a que se construíse alí, o tema é que, agora, se atopa completamente abandonada.

-Considera que trasladar estas reivindicacións ao pleno vai conseguir que se cumpran os obxectivos da entidade?

-Nós o que imos pedir é que se vote no pleno e que se faga a modificación necesaria para que non se poida construír na canteira de Durmideiras. O das melloras é un engadido, pero ímolo dicir para que quede constancia das nosas reivindicacións. Eu creo que non debera haber problemas para facer ese cambio, xa que tanto o PSOE como o BNG nos apoian na reivindicación desde hai anos. A postura da Marea non a sabemos porque naceu pouco antes destas eleccións e a do PP, está recollida nos medios de comunicación, en campaña dixo que desbotaba a opción de construír alí. Agardamos que haxa unanimidade porque parece que todas as forzas están a favor dese cambio.

-En que outros temas está a traballar a asociación?

-A semana pasada metemos por rexistro unhas peticións para que se amañasen varias rúas do barrio, como a Suevia ou a ronda de Monte Alto, que sofre a caída de augas fecais, ou a mellora das pistas deportivas de San Xosé, que é unha das grandes demandas que temos cara a 2016. A rapazada ten que trepar polos valados para poder xogar ao fútbol ou ao baloncesto, igual poñendo en perigo a súa integridade, cando temos unha pista deportiva completamente abandonada. Se a recuperamos para o barrio poderiámoslle dar uso. A rúa Pintor Román Navarro, xa o dixemos co outro Goberno municipal e repetímolo con este, que está nunha situación lamentable. Os edificios están caíndo e, recuperados, darían outra vida ao barrio. En decembro queremos tamén entregar un estudo detallado de todo o barrio onde imos tentar que participe todo o mundo para identificar cales son os puntos nos que non se cumpren as condicións mínimas de seguridade nos pasos de peóns, tanto lumínicas como de sinalización e accesibilidade.

-Hai novidades sobre o convenio da biblioteca?

-De momento, pouca cousa. Estamos á espera de se entra ou non nos próximos orzamentos. Solicitamos xa unha reunión co concelleiro de Culturas, José Manuel Sande, porque nós pedimos a recuperación do convenio.

Compartir en Twitter
Compartir en Facebook

ESPECIAL

PREMIOS OPINIÓN MÚSICA RAÍZ

Premios Opinión da Música de Raíz

Consulta aquí a información dos premios de música do noso diario


GALICIA EN VINOS

Galicia en Vinos

Todos los vinos de Galicia

Consulta aquí todos los vinos de las cinco denominaciones de origen de Galicia
 


esquelasfunerarias.es
Enlaces recomendados: Premios Cine