Héctor Tejón Membro de Stop Desafiuzamentos

"Desde o cambio de Goberno local, agora polo menos hai vivenda social, pero pouca"

"Os bancos fan agora responsabilidade social corporativa, mais aínda seguen a poñer obstáculos aos afectados por desaloxos"

28.01.2016 | 01:37

Stop Desafiuzamentos foi a plataforma social que deu visibilidade aos casos máis mediáticos de veciños afectados por desaloxos xudiciais, como Aurelia Rey ou Elisabeth Sanlés. Agora mantén encontros informativos e atende a cidadáns con problemas semellantes, explica un dos seus membros fundadores, Héctor Tejón, quen ve lixeiras melloras nas actuacións das administracións e os bancos para arranxar os casos, pero segue esixindo solucións claras.

-Os xulgados revelan que a meirande parte dos desafiuzamentos executados na cidade son por impago de aluguer. Son tamén os casos que máis chegan á súa plataforma?

-Os datos do poder xudicial hai que depuralos porque non é a primeira vez que aparecen incluidos os baixos que non poden seguir pagando. Que a xente non acuda a Stop Desafiuzamentos non significa que non haxa desafiuzamentos na cidade. De todos os xeitos, nos últimos tempos apreciamos que baixa a xente que ven a nós por un problema de desafiuzamento por impago de aluguer, pero cada vez veñen máis persoas por temas de claúsula chan ou de hipoteca ou para informarse antes de ter a orde de desafiuzamento. Por sorte xurdiu a conciencia de poñer antes a venda que a ferida.

-Están as administracións a mellorar esforzos por acadar axudas para os afectados?

-A Xunta ten un plan, chamado Realuga, do que non sabemos as solucións que da. Os afectados son ben atendidos e informados, pero non se lles da ningunha medida garantista de dereito á vivenda, e hai altas esixencias nas cláusulas para acceder ás axudas. E o Concello, dende o cambio de goberno municipal agora polo menos sabemos que hai vivenda municipal, pouca, pero a hai. Agora hai cinco, polo que informa.

-O anterior Goberno local di que paralizou 800 casos e facilitou 67 vivendas de aluguer social.

-¿Os números? É coma todo, a ver quén parou máis desafiuzamentos. Non creo que sexa un mérito paralos, é un demérito non ter garantido o dereito á vivenda. ¿Houbo 67 pisos? Non o sei. O que sei é que cada vez que nós fomos con casos de clara emerxencia social e necesidade de vivenda sempre recibimos a mesma resposta: non hai recurso, o que podemos ofertar é prazas en Padre Rubinos e o albergue de Sor Eusebia. Non sei se ofrecer habitación nun fogar de acollida é unha vivenda. Non deron alternativa habitacional ningunha, e cando se conseguiu foi pola presión da rúa. No Concello semella que o tema da vivenda sempre é opaco, hai un segredo como se fose algo do que avergoñarse.

-E os bancos, dan agora máis facilidades aos desafiuzados?

-Os bancos tomaron nota do que pasaba e fixeron unha responsabilidade social corporativa. Dan un tratamento cara fóra, pero polo que estamos sabendo seguen facendo chamadas de acoso inmobiliario e poñen problemas á hora de negociar a dación en pago. Hai moitos xiros que obstaculizan os pasos que deben dar os afectados. Nunca houbo boas prácticas e non hai facilidades para chegar a resolucións.

-Que accións vai seguir facendo a plataforma?

-Stop Desafiuzamentos mantén reunións informativas e atende aos afectados que contactan con nós. Somos un colectivo social que só pode informar e dar conciencia política do problema. As solucións teñen que vir doutro lado, dos que teñen recursos e competencias.

Compartir en Twitter
Compartir en Facebook

ESPECIAL

PREMIOS OPINIÓN MÚSICA RAÍZ

Premios Opinión da Música de Raíz

Consulta aquí a información dos premios de música do noso diario


GALICIA EN VINOS

Galicia en Vinos

Todos los vinos de Galicia

Consulta aquí todos los vinos de las cinco denominaciones de origen de Galicia
 


esquelasfunerarias.es
Enlaces recomendados: Premios Cine