Lembranza escénica a Balbino

Cándido Pazó chegará o 20 de maio ao Colón da man de 'Memorias dun neno labrego', adaptación teatral da obra de Neira Vilas

17.05.2016 | 02:13
O actor e dramaturgo Cándido Pazó.

"Todos somos fillos, netos ou bisnetos dun Balbino, e todos temos a sensación de que a historia fala un pouco de cada un de nós". Así describe o actor e dramaturgo Cándido Pazó a obra Memorias dun neno labrego escrita por Xosé Neira Vilas. Pazó conseguiu adaptala e levala a escena hai cinco anos, e o próximo 20 de maio ás 20.30 horas chegará ao teatro Colón na que será a súa función "numero 146".

O idilio escénico de Cándido Pazó con Balbino, o protagonista do libro, cobrou vida no ano 2011, aproveitando o cincuenta aniversario da publicación en Bos Aires da obra máis lida da literatura galega. Pazó, quen viu na efeméride unha oportunidade para botar a andar unha adaptación que levaba tempor rondando o seu maxín, comezou unha andaina na que poñería enriba do escenario "a memoria colectiva dun país" a través das lembranzas vitais dun labrego co que "os galegos adoitan sentirse identificados". Un labrego pobre cuxa vida está presente en "todo neno desfavorecido que non pode vivir a súa infancia aproveitando ao máximo as ocasións que esa etapa vital brinda para ser feliz".

Sobre as táboas, Pazó mistura a capacidade narrativa que aporta a novela de Neira Vilas, coa súa faceta máis teatral, coa que da vida ás pasaxes relatadas por Balbino. Neste senso, se ben o tema central da adaptación é o libro Memorias dun neno labrego, o dramaturgo engade, nunha chiscadela á súa faceta coma contacontos e monologuista, "experiencias biográficas, tanto propias coma alleas". A posta en escena realizada por Pazó está aderezada con música e proxeccións audiovisuais que axudan a que os espectadores se somerxan na atmósfera rural galega configurada pola pluma de Xosé Neira Vilas a mediados do século pasado.

Aínda que unha adaptación dunha obra escrita "sempre é unha arma de dobre fío", Pazó recoñece atopou en Neira Vilas "un absoluto seguidor e cómplice do proxecto" desde o seu comezo ata o seu falecemento o pasado ano. O escritor, que viu a representación de Pazó "cinco veces", soubo apreciar o xiro cómico que o dramaturgo vigués conseguiu dar a unha historia "que apela ás emocións e á sensibilidade". En palabras de Pazó: "Unha das cousas que máis satisfacían a Neira Vilas desta adaptación foi que introducísemos tanto material humorístico na peza, xa que dicía que a comicidade relanzaba a temática central do libro".

Estes cinco anos de vida da obra Memorias dun neno labrego, ademais de ser un sinal que avala a súa boa recepción por parte do público contribuiron, segundo apunta Cándido Pazó, "a facer que evolucionase desbotando algúns dos elementos iniciais e engadindo outros novos que a fan estar máis depurada e redonda".

Ao tempo que sigue subindo ás táboas de diversos escenarios galegos a súa adaptación de Neira Vilas, Pazó conta un repertorio de contos inspirados en toda a obra de Castelao titulado Que comerá o rei, un proxecto que combina co seu papel coma director e autor da obra Foucellas, representada por Talía Teatro, e coa súa faceta de autor da peza As do peixe, que interpretará a agrupación teatral Abrapalabra Creacións Escénicas o próximo 21 de maio ás 20.30 horas no Colón. As entradaspara a función poderán ser adquiridas a uns prezos entre os 6 e os 12 euros, informa o auditorio.

Compartir en Twitter
Compartir en Facebook

ESPECIAL

PREMIOS OPINIÓN MÚSICA RAÍZ

Premios Opinión da Música de Raíz

Consulta aquí a información dos premios de música do noso diario


GALICIA EN VINOS

Galicia en Vinos

Todos los vinos de Galicia

Consulta aquí todos los vinos de las cinco denominaciones de origen de Galicia
 


esquelasfunerarias.es
Enlaces recomendados: Premios Cine