REDACCIÓN | A CORUÑA Nun momento delicado da súa carreira, o público español acolleu con entusiasmo a proposta musical do escocés Alasdair Fraser e por iso o violinista garda un agarimo especial a aeste territorio e comenta sentirse emocionado "pola enerxía co que renaceu a música do norte da Península. Semella que as novas xeracións tocan con orgullo e iso está latexante sobre todo en Cantabria, País Vasco, Asturias e Galicia", asegura Fraser.

O músico escocés xa colaborou con Mercedes Peón, Hevia, Kepa Junkera e o grupo asturiano Tejedor, e o resultado pode comprobarse no álbum en directo da banda Skyedance, publicado no ano 2000. "Encántame o feedback continuo cos espectadores e a paixón, a ledicia e a arte que respiro en cada un dos concertos. Apórtame unha enorme forza", recoñece Fraser, quen agora está implicado nos concertos que realiza canda a violonchelista estadounidense Natalie Haas.

O artista adoita dicir que o seu violín soa en gaélico. "O instrumento ten a habelencia de falar moitos idiomas. Pode comunicar cousas diferentes segundo a cultura de que se trate". Fraser defende que a música tradicional e a académica "non teñen por qué estar rifadas, aínda que as veces o pareza. O importante é o que se quere expresar, tocar para diferentes estados de ánimo, para bailar, para reflexionar, para crear máis... En resumo, tocar para a vida".

Dende hai anos adica parte do seu tempo a impartir cursos de formación en Estados Unidos, en Escocia e agora tamén en España, porque sente a necesidade de transmitir os seus coñecementos. "Ensinar faime formular novas preguntas, que dan respostas que, á súa vez, xeran outras preguntas. E, ademais, gústame compartir o que me vou atopando", explica Fraser.