Catro curtametraxes galegas en Ottawa (Canadá)

Dentro dun programa de actividades de difusión e internacionalización do audiovisual galego

EUROPA PRESS O Consorcio Audiovisual de Galicia proxectará catro curtametraxes galegas o próximo martes día 25 nunha mostra cinematográfica en Ottawa (Canadá).

Estas curtas galegos, incluídos no catálogo 'Curtas 09', foros elixidas como as "máis representativas" de 2008, segundo sinalou o Consorcio nun comunicado. Tres deles foron seleccionados por unha comisión de expertos e o cuarto obtivo o Premio do Público á mellor Obra de Animación no Festival de Cans, celebrado no Porriño (Pontevedra).

Desta forma, segundo asegurou o Consorcio, estarán reflectidos "tanto os gustos do público" como un "abano variado de xéneros" -documental, ficción e animación-, o que favorecerá a "promoción internacional" das producións de Galicia.

As curtas que se proxectarán serán 'The Werepig', peza de animación dirixida por Sam Ortí e premiada en numerosos festivais nacionais e internacionais; 'Mínimo Común Múltiplo', de Rubén Coca, candidata nos premios Mestre Mateo 2008; 'Por Nada, dirixida por Dani de la Torre e Toni Veiga; e 'Bata por fóra (muller por dentro)', unha curta documental de Claudia Brenlla.

A mostra de documentais celebrarase os días 25, 28 e 31 de agosto no Auditorio da Biblioteca e Arquivos de Canadá (Ottawa), coa primeira das xornadas centrada nas curtametraxes galegas.

O Consorcio Audiovisual de Galicia manifestou tamén a "vocación de continuidade" do evento, que espera "ampliar a outras cidades do país", como Montreal, Toronto ou Vancouver. Ademais, sinalou que analizará a posibilidade de acompañar a mostra dun "encontro de profesionais" para traballar na vertente "máis económica e de negocios".