O. L. | A CORUÑA Na súa segunda edición, o PREMIO OPINIÓN ANDAINA SENLLEIRA recaeu en Antón Corral, quen sucede a Emilio Cao no palmarés.

O gañador naceu na Coruña o 11 de xullo de 1936 e aos dous anos de idade a súa familia trasladouse á aldea lucense de Santa Marta. Tres anos máis tarde marcharon a Lugo, cidade na que pasou toda a súa infancia. O son da gaita e da música tradicional chamou a súa atención dende cativo e o primeiro grupo que montou chamábase Os Garabullos do Alto.

Anos máis tarde formou parte de grupos prestixiosos como Os Modernos de Lugo e Os Montes de Lugo. Naquela época tamén principiou a súa inclinación á docencia e impartiu clases de gaita na asociación Cantigas e Frores. Corral lembra os moitos quilómetros feitos en bicicleta no traxecto dende Lugo a Luaces e Pol para ensinar as claves do instrumento máis representativo de Galicia.

Principiou como gaiteiro, seguiu como docente e aínda comezou outra actividade ao redor da gaita, posto que se fixo construtor deste e outros instrumentos. Logo dunha curta estadía en Ortigueira, Corral asentou a súa vida en Vigo, a onde chegou en 1983. Alí fixo un gran labor como mestre e artesán do Obradoiro Escola de Instrumentos Populares, onde estudaron músicos que agora son de primeira liña e no que se editou un disco dobre que se constituiu nun referente na música galega. Este home tamén fundou a banda de gaitas Xarabal, unha das de maior prestancia en Galicia e por toda esta bagaxe o xurado composto polos xornalistas Xoán Manuel Estévez, Óscar Losada e o grupo Lizgairo decidiu outorgarlle por unanimidade o galardón.