ÓSCAR LOSADA | A CORUÑA
Jorge Fernando é un nome que aparece na sombra para o gran público diante das cantantes de fado que ocupan o sitio central no escenario debaixo dos focos da sona, pero a súa presenza é dunha gran importancia, posto que estamos a falar dun extraordinario compositor que é xa historia viva no fado. Fernando é autor dalgún dos mellores fados escoitados e da súa sabedoría musical xa tiraron partido artistas como Mariza ou Ana Moura, que o tiveron como produtor dos seus traballos.
Este home tamén ten unha carreira propia como intérprete e agora dá un novo paso con Vida, no que conta con varias colaboracións e no que amosa novamente as súas salientables aptitudes como compositor e letrista, ollo a este importante apartado no que deixa unha profunda pegada literaria, aínda que noutro aspecto vese que non é un gran cantante, aínda que sabe dotar de sentimento ás súas creacións.
Ana Moura participa en Por um día, do mellor da obra, o grupo polifónico corso A filetta en Lisboa noite triste, Lucio Dalla en 4 março 43 (minha historia) e unha viraxe abraiante sucede coa notable Pois é, onde o rap e o fado chegan a darse a man sen ningún tipo de problema e cun entendemento mutuo que rompe fronteiras entre os mundos de Sam the kid e Fernando.
A peza que dá título ao disco contén dúas versións. Na que abre o traballo escoitamos a Fábia Rebordão, unha fermosa voz que se deu a coñecer nun concurso televisivo, e pecha o disco unha homenaxe vital, xa que ouvimos á desaparecida Amália Rodrigues entoando a canción nunha gravación recollida en estudo nos últimos anos da súa vida.
Outros convidados son o acordeonista Daniel di Bonaventura e o trompetista Marcio Montarroyos.
Dezaseis temas conforman un álbum con desniveis, mais que ofrece momentos aprezables nos que Jorge Fernando aporta toda a súa experiencia e coñecementos adquiridoa ao longo dunha carreira sobranceira. Tamén cómpre sinalar o traballo desenvolvido por Custódio Castelo á guitarra portuguesa, da que está considerado un dos mellores intérpretes actuais.
.gif)
