REDACCIÓN | A CORUÑA
O departamento de Educación do Concello de Santiago de Compostela e Kalandraka convocan o III Premio Internacional Compostela para álbumes ilustrados, cunha dotación económica de 12.000 euros en concepto de adianto polos dereitos de autor. Kalandraka publicará a obra premiada nas cinco linguas oficiais da península en outubro do 2010.
O prazo para presentar os traballos aspirantes ao galardón rematará o 26 de febreiro e o fallo do xurado darase a coñecer o 2 de abril, de xeito que coincide coa celebración do Día Internacional do Libro Infantil e Xuvenil e coas actividades desenvolvidas no marco da X Campaña de Animación á Lectura que organizan o concello de Santiago e Kalandraka.
O Premio Compostela está dirixido a autores e ilustradores de calquera nacionalidade que presenten obras orixinais e inéditas. As persoas interesadas en presentarese ao certame deberán enviar cinco copias do texto en calquera das linguas oficiais da Península Ibérica, tres ilustracións orixinais e cinco fotocopias en color de cada unha delas, xunto cunha maqueta impresa de todo o proxecto. O material deberá estar asinado baixo un lema ou un pseudónimo.
