REDACCIÓN | A CORUÑA
Caixanova prepara para principios do ano 2010 unha gran mostra que recolla de xeito fiel o labor artístico de Luís Seoane. A exposición está comisariada por Carlos L. Bernárdez e Fernando M. Vilanova e ten como obxectivo facer especial incidencia nas diferentes épocas, relatos, significacións figurativas, influencias e compromiso do artista ao longo da súa traxectoria.
As salas de exposicións de Caixanova en Vigo, Pontevedra e Ourense acollerán esta mostra coa que a entidade financeira quere render unha homenaxe a un dos intelectuais máis representativos da cultura galega no centenario do seu nacemento. Nela reuniranse pezas cedidas polas principais pinacotecas da comunidade, como a Fundación Luís Seoane, o Museo de Belas Artes da Coruña, a Fundación María José Jove, o Parlamento de Galicia ou o Museo Quiñones de León, ademais doutros particulares e a Colección Caixanova.
Fillo de pais emigrantes, Seoane naceu na cidade arxentina de Bos Aires o 10 de xuño de 1910, onde residiu ata os seis anos, cando os pais retornan á Coruña, cidade na que faleceu en 1979. Polo propio feito do seu nacemento na diáspora, así como polo seu traballo como artista e intelectual comprometido no exilio desde 1936, de novo en Bos Aires, a carón do máis selecto da nosa intelectualidade, como Castelao, Dieste, Núñez Bua, Lorenzo Varela ou Arturo Cuadrado, converteuse nun representante senlleiro da emigración galega.
A súa obra, caracterizada pola heteroxeneidade, vai xuntar dúas fórmulas ás que manterá fidelidade: a memoria ao seu país de orixe nos conceptos positivos da tradición, entendida esta como herdanza consanguínea e homoxeneizadora dun xeito de sentir e de resolver, e a vontade cosmopolita e de modernidade, inherente a unha formación intelectual de grandes inquedanzas. O froito é unha obra cargada de humanismo, cun grande abano de formas e materiais, e coas xanelas abertas ao progreso e aos valores que poden enriquecernos.
Baixo o espírito de superación e resposta que enmarcaba a emigración e o exilio cunha vida nova nun mundo novo, o polifacético artista desenvolveu un labor impagable en Bos Aires. Tratou todos os eidos da produción cultural: debuxante, muralista, editor, gravador, pintor, poeta e ensaísta, editor radiofónico ou deseñador industrial. O seu amigo Manuel Colmeiro contaba "alí onde se batía algo noso, estaba Seoane". E Rafael Dieste: "Moitos dos libros que ilustrou pasaron por ser no seu tempo os máis fermosos do mundo".
No seu retorno a Galicia, en 1963, tiña xa un prestixio gañado que prolongou na súa terra dende o Laboratorio de Formas, xunto con Isaac Díaz Pardo, que deu orixe ás Cerámicas do Castro e a Sargadelos, mantendo a súa actividade creativa como pintor e gravador ata seu derradeiro alento.
