AXENCIAS | VIGO O xurado da oitava edición do Concurso Internacional de Cartelismo Publicitario Francisco Mantecón, convocado por Terras Gauda, outorgou onte os seus premios a un total de catro carteis de España, Estonia, EEUU e Polonia, escollidos de entre máis de 1.400 obras enviadas dende 45 países de todo o mundo.

Estes galardóns supoñen unha achega económica total de 16.000 euros por parte da adega galega e foron entregados onte en Vigo nun acto presidido polo xefe do Executivo galego, Alberto Núñez Feijóo.

O primeiro premio, dotado con 10.000 euros, recaeu no deseñador valenciano Ángel Luis González, cuxo traballo será a imaxe da adega para o 2010. Ademais, entregáronse dous accésits de 2.000 euros cada un: á deseñadora de EEUU Julia Anne Luke e ao artista gráfico de Estonia Robi Joeleht.