REDACCIÓN | A CORUÑA
A Comisión Executiva do Consello da Cultura Galega expresou onte a súa "preocupación" polo futuro do "importante legado cultural" recuperado e reunido durante anos polo intelectual galego Isaac Díaz Pardo no Museo Carlos Maside, no Seminario de Sargadelos e no Seminario de Estudos Galegos.
Segundo explicou o Consello, este legado constitúe "un quiñón esencial do patrimonio cultural colectivo" de Galicia, fardel "da memoria histórica" galega e "garantía de transmisión" que é necesario preservar, protexer e "poñer en valor ao servizo de Galicia".
Ao respecto, o CCG lamentou que "quedasen inconclusas as tarefas de ordenación e dixitalización do material conservado no Instituto Galego da Información", levadas a cabo ao amparo dun convenio asinado co Consello da Cultura Galega e o Seminario de Estudos Galegos.
O padroado do Museo do Pobo Galego acordou por unanimidade facer pública a súa solidariedade con quen é unha das figuras "máis singulares da cultura galega dos últimos setenta anos". En consonancia, o padroado recordou a súa "larguísima, exemplar e infatigable traxectoria".
