XOSÉ MANUEL MALLO Iso dos partidos ás tres da tarde parecía unha alucinación dun iluminado que voltou ao fútbol para reventar o mercado a base de millóns de euros que acadou por mor da súa solvencia persoal. Millóns que terían que servir para pagar as débedas que o seu clube ten con todos nós -Facenda e Seguridade Social-, pero coma algúns gozan de certas prebendas hai que aturalos, a eles e a quen lles permite facer o que queiran. O pior non é que pense que é bon que haxa partidos ás tres, o pior é que hai quen lle da a razón, ese quen é a Liga do Fútbol Profisional. Francisco Roca, director xeral da patronal do fútbol, di que é unha boa idea. Deste xeito, di, ábrese un mercado importante en China, onde serían sobre as nove ou a dez da noite. En que parte de China? Que pensa, que a extensión dese país é coma a de España? E logo sabe ese home cais son os horarios polos que se rexe a xente en España? Polo menos aquí en A Coruña ás tres, un sábado ou un domingo, a xente está a piques de sentar a xantar ou nalgún caso está aínda co aperitivo. Que a xente traballa toda a semana e aproveita a fin de semana para xantar cos seus. A algúns xa lles costa ir ao campo ás cinco para ir ás tres. Algún debería mirar o que toma no almorzo, no xantar, na cea ou entre esas horas. Non sei que pensa o presidente do Deportivo. Supoño que se o seu clube saca tallada dirá que si, que é o normal, pero se os beneficiados son os dous de sempre, Madrid e Barça, a resposta debe ser non. Pon Roca o exemplo de Inglaterra. Sabe por que horarios se rixen os británicos? Coñece os seus costumes? Que teñen que ver cos nosos. Haberá que xantar ás doce.