XOSÉ MANUEL MALLO
Hai ben pouco Lopo, entre outros compañeiros seus, preguntaba que era mellor, xogar ben e non gañar ou que xoguen como o están a facer e obter as vitorias que están a acadar. Era co gallo do partido disputado polos albiazuis en Tenerife, onde gañaran polo mesmo tanteo que onte en Murcia. A resposta é contundente, pois o máis importante no fútbol é ganar. Para moitos é o único importante. E foi Lopo, precisamente, o que acadou onte o gol que lle deu o triunfo ao seu equipo. Outra vez en xogada de estratexia. Ollando as notas; ollando o partido; ollando o que escribe o meu compañeiro Rubén Darío desde Murcia hai que dicir polo menos... o Deportivo gañou. Non o poden dicir todos os equipos de primeira que se enfrontaron contra rivais de categorías inferiores. O Madrid e o Athletic perderon diante de conxuntos de Segunda B e Segunda División, Alcorcón e Rayo Vallecano, respectivamente. Os galácticos saíron estrelados diante dos seus veciños da comunidade (4-0) e os bilbaínos cun resultado importante de Vallecas (2-0). Hai quen di que non van ter problemas, en especial os brancos, para continuar nesta competición, pero a vergoña -se a teñen- xa a pasaron. Mentres, por aquí, podemos falar do mal que xogou o Deportivo en Murcia; de que Manu, na súa estrea, foi clave para que o seu equipo voltase vitorioso; podemos falar de moitas cousas e moi poucas boas deste partido de La Condomina, pero ao final todo conclúe no mesmo: o equipo albiazul gañou e ten os oitavos de final case na man. Para quedar fóra ten que perder por máis dun gol na casa, ou por un sempre que encaixe dous o máis tantos. É posíbel. Si. Pero o primeiro pao deuno el no seu desprazamento a Murcia. Mal partido. Horríbel. Si, pero...
