XOSÉ MANUEL MALLO Outro empate. Outro punto. Hugo Sánchez di que é inxusto. Lotina sae satisfeito, dadas as circunstancias. Vendo o que pasou, vostede, afeccionado do Deportivo, pensará que o seu equipo tivo mala sorte despois dos dous remates aos paos da portería local. Tamén por alá abaixo pensarán, despois da segunda parte, que mereceron os tres puntos. Todos mereceron, todos pudieron, pero a realidade é que cada equipo sumou un punto. Penso que é positivo para o equipo coruñés. Certo que perdeu un posto na clasificación, pero segue aí. Hai que ter moi presente que os catro últimos partidos de 2009 non eran, son, doados. Dous eran fóra -Santander e Almería- diante de dous rivais moi necesitados; os outros dous, os da casa, perante conxuntos de outra liga: Barcelona e Valencia. Á falla do enfrontamento contra os valencinistas a colleita é de catro puntos. Non é mala, que dicimos por aquí. Todo o que sexa máis habería que calificalo de espléndido. En calquer caso, cómpre dar outro paso máis cara adiante. Sobre todo polo que pode supór de respeito gañado diante dos adversarios. Chegar ao lecer de Nadal con 29 puntos sería impensábel hai catro meses, pero está aí a posibilidade. Unha cifra tremenda a falla de catro partidos para rematar a primeira volta. Hai quen aínda prefire pensar en acadar canto antes os 42 ou 43 puntos para certificar a continuidade na máxima categoría; outros xa van moito máis lonxe. No campo todo, ou case todo, se equilibra, agás excepcións que se ven cada semana, pero as diferenzas tamén son grandes.