EUROPA PRESS Os 300 traballadores da fábrica que Caramelo ten no polígono da Grela, na Coruña, foron desaloxados hoxe despois de que a central da empresa recibise a unha ameaza de bomba, polo que mantivo a actividade paralizada durante unha hora e media ata que se confirmou que era unha falsa alarma.
Segundo confirmaron fontes de Caramelo a Europa Press, unha muller anónima realizou a chamada ás 12.03 horas, coincidindo co día no que comezaron a facerse efectivos os primeiros despedimentos dos 237 que están previstos no Expediente de Regulación de Emprego (ERE) que está en macha dentro da empresa.
O prazo para anotarse voluntariamente pechouse o pasado venres e Caramelo confirmou que se acolleron a esta opción 234 empregados e que outras tres persoas serán incluídas de forma forzosa.
INVESTIGACION
Tras o desaloxo, unha patrulla da Policía Nacional compareceu na fábrica e, máis tarde, efectivos de rastrexo confirmaron que se trataba dunha falsa ameaza, co que os 300 empregados volveron aos seus postos de traballo pasadas as 13.30 horas.
A empresa téxtil declinou facer comentarios sobre este incidente e espera que a investigación aberta poida esclarecer quen está detrás desta ameaza falsa.