O soldo medio galego debería subir 540 euros anuais para non perder poder adquisitivo

Segundo a OCDE os salarios españois quedaron un 11 por cento por "debaixo da inflación" entre 1997 e 2007

A CIG propón que os salarios que se atopen por debaixo da media galega, que estima --a falta de que se coñezan os datos do Instituto Nacional de Estatística (INE)-- en 18.100 euros, suban 540 euros ao ano (un 3 por cento) porque "se non, van perder poder adquisitivo".

Así o expuxo hoxe o secretario confederal de Negociación Colectiva e Saúde Laboral da CIG, Antolín Alcántara, nunha rolda de prensa para presentar as propostas da organización sindical para a negociación colectiva. Na súa intervención, criticou que se use como referencia para as actualizacións salariais o Indice de Prezos ao Consumo (IPC), xa que este indicador mide unha inflación "moi concreta" que, ao seu xuízo, non pondera suficientemente, por exemplo, o peso da alimentación.

Alcántara sinalou que, segundo a Organización para a Cooperación e o Desenvolvemento Económicos (OCDE), entre 1997 e 2007 os salarios españois quedaron un 11 por cento por "debaixo da inflación" e considerou un dato "elocuente" que en Galicia as rendas do capital superen ás do traballo. "Os ingresos do 20 por cento da poboación son superiores aos do 80 por cento restante", dixo e censurou que o discurso "é sempre o da competitividade, pero nin Galicia nin en España son máis competitivas por ter salarios máis baratos".

O responsable de negociación colectiva na CIG alertou tamén acerca de que "moitas empresas aproveitan --os expedientes de regulación de emprego-- para establecer a xornada flexible por tempo indefinido", e sinalou en concreto ao sector da automoción. E un "perigo", afirmou, pois "irradia a outros sectores" e estas medidas deben ter "sempre carácter temporal", defendeu.

Manifestou, así mesmo, as súas dúbidas respecto á implantación do 'contrato alemán', que considerou que pode "ser parecido" a un ERE de xornada parcial con cargo, en parte, á prestación por desemprego do traballador. Ao fío diso, manifestou o seu temor de que se instale esta alternativa no sistema como unha flexibilización da contratación.

MEDIDAS EN FAVOR DA MULLER

Pola súa parte, a responsable da área de muller, Margarida Curral, criticou que, coa crise, se deixou de poñer atención nas medidas de impulso á contratación feminina. "A prioridade dos traballadores é saír adiante e a discriminación por xénero para a segundo termo", expuxo.

Por iso, reclamou "activar todos os mecanismos para protexer as traballadoras" e a posta en marcha de medidas para fomentar a inserción laboral das mulleres e resolver as diferenzas que persisten en comparación como os homes, como que os salarios sexan menores. "A crise non se pode usar como escusa para non impulsar medidas de igualdade e non se pode impoñer o medo", proclamou.

Ademais, o secretario confederal de Negociación Colectiva reiterou o seu rexeitamento aos modelos de diálogo social postos en marcha en España e en Galicia, pois "se converten nun diálogo entre as cúpulas" e a negociación "se ten que establecer directamente coa clase traballadora", concluíu.