A Deputación da Coruña impulsa unha rede de formación para favorecer a inserción laboral

O proxecto, cofinanciado polo Fondo Social Europeo (FSE), a través do Ministerio de Facenda e Administracións Públicas, e a Deputación da Coruña conta un investimento de máis de dous millóns de euros. A través da Rede Técnica Municipal, os concellos ceden as súas instalacións para a formación e capacitación de desempregados non só do seu propio concello, senón tamén doutros próximos.

Prácticas profesionais

As empresas adquiren un papel protagonista no proxecto, ao participar no programa de prácticas profesionais. Mediante a sinatura dun acordo de colaboración co organismo provincial para a acollida de alumnado en prácticas, pon de manifesto o seu compromiso co emprego contribuíndo á construción dunha provincia máis responsable socialmente. A Deputación da Coruña subscribiu xa un total de 130 acordos con empresas como Ipasa, Bricoking, Grupo Calvo ou Gonzacar... así como un gran número de pequenas empresas, en especial nos sectores agrícola, eléctrico e da automoción. As prácticas en empresas, ademais de completar a formación das persoas beneficiarias, supoñen unha oportunidade máis de emprego, posto que nalgunhas ocasións as empresas colaboradoras convertéronse en empregadoras. Para facilitar a participación das persoas desempregadas, o proxecto RedeXiana2 conta cun programa de bolsas no que se investiron preto de 150.000 euros.

184 cursos desde 2013

Dentro do proxecto RedeXiana2 realizáronse máis de 17.000 horas de formación teórica e 126.000 de prácticas, das cales ao redor de 40.000 corresponden ás accións formativas de carné de conducir e de transporte de mercadorías por estrada, pois o proxecto facilita ás persoas participantes a obtención do carné de conducir B e C e o acceso ao Certificado de Aptitude Profesional (CAP) de Transporte de Mercadorías. Os sectores de formación máis relevantes son o de servizos de proximidade para a dependencia, o de enerxías renovables, a agricultura, o sector industrial e o de transporte e loxística. Ademais impartíronse outras accións de capacitación e preformación como habilidades sociais e comunicativas, alfabetización informática, prevención de riscos laborais e manipulación de alimentos.

O fomento do autoemprego ocupa un lugar relevante en Rede Xiana2 e, neste sentido, desenvolvéronse diversas accións formativas como a comercialización electrónica, a xerencia de empresas de economía social e a creación de empresas. Estas accións están encamiñadas a concienciar e sensibilizar ás persoas beneficiarias na oportunidade que supón o autoemprego como unha boa opción para confeccionar o seu propio futuro laboral. Deste xeito incentívase a xeración de ideas de negocio innovadoras e viables, con perspectivas reais de lograr a súa propia inserción laboral.

Continuación da formación

A fase de prácticas rematou recentemente para o alumnado dos cursos de Operador de Estiba e Desestiba realizado en Carballo e para os do curso de Montador de Estruturas Metálicas, en Fene. En Cerdido e Trazo continúan coa formación teórica do curso de Atención Sociosanitaria a Persoas Dependentes en Institucións Sociais, así como os do curso de Horticultura e Floricultura que está a impartir Cerdido e cuxas prácticas terán lugar nas instalacións dunha empresa emerxente na produción e distribución de arandos.

Tamén están en marcha os cursos de Condutor de Vehículos de Clase B en Culleredo e os de Transporte de Mercadorías (CAP) en Culleredo e Santiago, que próximamente se realizarán tamén na Coruña, Santiago e Ferrol. En Touro vaise impartir un curso de Actividades Auxiliares en agricultura, en Zas unha nova edición de Atención Sociosanitaria a Persoas Dependentes en institucións sociais, un de Mantemento de Redes Eléctricas de Alta Tensión de Segunda e Terceira Categoría e Centros de Transformación en Ames e en Muxía e outro de Montaxe e Mantemento de Instalacións solares Fotovoltaicas tamén en Ames.