Nas leccións seguintes poñeremos, coma hoxe, os modelos dos verbos IRREGULARES máis usados. Aprendédeos. Pero antes: VERBOS IRREGULARES son os que non se axustan o modelo de conxugación regular, que xa vimos no tema anterior. Estas irregularidades afectan á raíz ou radical e á vogal temática.
Aínda que é moi pequeno o seu número son de uso moi frecuente, por iso é moi importante o seu estudo.

OBSERVADE que na 3ª persoa do presente de indicativo a carón da forma “HA” usada normalmente como auxiliar —ha morrer— —ha facer tal cousa—, temos a forma impersoal “HAI”. Exemplo: Hai tempo que non o vexo”. “Hai contaminación no mar”.

RECORDEMOS AS NOVAS NORMAS
(Continuación)

Os grupos cultos -ct - e -cc- redúcense a -t- e -c- cando van tras as vogais i e u.

Disto xa temos falado pero repetímolo:

A) Deben escribirse: tradución, estrutura, produto, delito, ditado, conduta, vítima, construción, xurisdición, tradutor, produción.

*Son moitas e moi difíciles para recordalas todas aquí, o mellor é consultar un bo dicionario actualizado.

- Agora vexamos unha morea de palabras cultas que non suprimen o “c”. Polo tanto.

B) Deben escribirse igual: veredicto, edicto, dicción, adicción, indicción, invicto, micción, convicción, dúctil, eructo, fricción. O que confirma a nota anterior da súa dificultade

C) Debe dicirse: reitor (O Reitor da Universidade), reitorado, reitoral.