Unha embarcación rescata o tripulante dun pesqueiro tras encallar

O tripulante dun pesqueiro foi rescatado hoxe polos membros doutra embarcación tras encallar nas proximidades do cabo de Estaca de Bares

EUROPA PRESS O pesqueiro ten a súa base no porto de Cariño e o tripulante atópase "en bo estado" e con "un pouco de hipotermia", sinalaron as mesmas fontes.

O suceso produciuse sobre as 13.15 horas cando o pesqueiro M.K.A encallou nas proximidades do faro de Estaca de Bares. O único tripulante a bordo foi rescatado por outra embarcación que se atopaba pola zona e trasladado a Cariño e dende alí ao Hospital Arquitecto Marcide de Ferrol.

Fontes de Salvamento Marítimo explicaron que se trata dunha embarcación pequena e que en primeiro momento non se deu localizado, a pesar de que ao lugar se trasladou a Salvamar Shaula, que se encargou da súa busca por mar, mentres efectivos de Protección Civil o facían por terra.

Aínda que en principio se formulou a posibilidade de que a embarcación se afundise, ante as dificultades para atopala por tratarse dunha zona de difícil acceso, finalmente foi localizada enriba dunhas rochas sobre as 18.00 horas