O BNG cualifica de ´histórica´ a manifestación en defensa do galego

O líder nacionalista incidiu na necesidade dunha "reacción social decidida" para rectificar a "actual política anti-idioma galego" que está levando a cabo a Xunta de Galicia

EFE O voceiro nacional do BNG, Guillerme Vázquez, considerou "histórica" e "sen precedentes" a manifestación de onte en Santiago de Compostela en defensa da lingua galega.

Vázquez afirmou, nunha conferencia de prensa, que os participantes dixeron "alto e claro que queremos galego, queremos o dereito a poder falar o noso idioma" e que están "orgullosos" de ser galegos.

O líder nacionalista incidiu na necesidade dunha "reacción social decidida" para rectificar a "actual política anti-idioma galego" que está levando a cabo a Xunta de Galicia.

Para Vázquez, o Goberno autonómico "debe impulsar" a lingua galega en todos os ámbitos e "non combatelo como está facendo", xa que impulsar o idioma "é o que marca" o Estatuto galego.

Vázquez afirmou que "rectificar é de sabios" e que Núñez Feijóo "aínda está a tempo de facelo" e pode "volver ao consenso que unilateralmente rompeu".

O dirixente nacionalista dixo que o BNG "non está disposto a dar un paso atrás, a ceder un milímetro" na defensa da lingua galega, e por iso demandou a Núñez Feijóo que "respecte" a legalidade estatutaria, a Lei de normalización lingüística e o Plan de normalización de 2004.

En relación á presenza do ministro de Xustiza, Francisco Caamaño, Vázquez afirmou que "cantas máis persoas estean a favor do idioma, mellor", aínda que pediu unha actuación política con "coherencia".

"Alegrámonos da presenza de Caamaño e convidámolo a que utilice o seu cargo, na medida das súas posibilidades, algunhas ten, para impulsar tamén o galego no ámbito da Xustiza, un ámbito onde, precisamente, a galeguización brilla pola súa ausencia", dixo Vázquez.

Por outra parte, o máximo dirixente do BNG, en resposta ás preguntas dos xornalistas, fixo referencia ás declaracións de Núñez Feijóo nas que avogou por unha educación "propia do século XXI" que aspire ao trilingüismo do galego, o español e o inglés.

A este respecto, Vázquez indicou que lle parece "moi ben" e que el pode falar de "cuatrilingüismo ou quintilingüismo", pero que o problema é "onde queda o galego".