Traballadores de Pascual piden á Xunta que acepte o plan das cooperativas

REDACCIÓN. A CORUÑA Os traballadores de Leche Pascual levaron onte ao Parlamento galega as súas reivindicacións laborais para evitar o peche da planta de Outeiro de Rei (Lugo) defendendo os proxectos empresariais presentados por varias cooperativas para rescatar a central leiteira. Logo de manifestarse fronte á Cámara galega, o avogado dos empregados de Pascual, Alberte Xullo Rodríguez Feixoo, censurou que a Xunta non dea unha explicación "pública ou en privado", de por que "entende" que algún dos tres proxectos para recuperar a actividade na factoría lucense "non é serio ou viable". "Sabemos que ten enriba da mesa proxectos que poden recuperar a factoría", insistiu, tras asegurar que planta de Pascual en Lugo "alimentaba" a 155 familias e máis de 1.000 postos de traballo indirectos —gandeiros, transportistas e comerciantes da bisbarra—.
O avogado defendeu que algún dos proxectos presentados —o de Feiraco e outras cooperativas lácteas, La Arzuana e Nueva Rumasa— están avalados pola auditora internacional PricewaterhouseCoopers polas "entidades crediticias de maior solvencia de Galicia". "Iso dános pé a pensar que é un proxecto serio", considerou. Feixóo respondía así aos recelos manifestados pola Xunta respecto deses proxectos, que segundo insistiu onte o conselleiro de Medio Rural, Samuel Juárez, non teñen suficientes garantías de supervivencia económica. "Non creo que aos traballadores lles interese un proxecto inviable que os deixe nunha situación peor incluso da actual", dixo Juárez á Radio Galega. Os empregados de Pascual en Outeiro de Rei levan dous meses e medio cos seus contratos suspendidos a consecuencia do expediente de regulación de emprego (ERE) temporal aprobado en agosto e que, de non atopar antes un proxecto que reflote a planta, será definitivo en decembro.