A Cámara pide a constitución efectiva da Axencia de Radiocomunicacións

Os parlamentarios consideran que deste modo se cumprirían os diferentes acordos, tanto da Cámara galega como do Congreso, para desenvolver esta acción

EFE O Parlamento galego aprobou hoxe, por unanimidade, unha proposición non de lei presentada polo PPdeG, que foi transaccionada co BNG e o PSdeG, pola que lle solicita ao Goberno central a "constitución efectiva" da Axencia Estatal de Radiocomunicacións e que a sede sexa Galicia.

Segundo o texto aprobado, os deputados solicitan, ademais, que se garantan os compromisos orzamentarios e as dotacións patrimoniais que se puidesen derivar das negociacións co Goberno para a posta en marcha da sede desta axencia.

Por outra parte, o Parlamento aprobou hoxe tamén cos votos do PP, o rexeitamento do BNG e a abstención do grupo socialista, unha iniciativa do grupo popular pola que a Cámara galega insta á Xunta a desenvolver un programa de mellora da competitividade do comercio de proximidade.

Segundo defendeu a deputada do PP Cristina Romero, entre os obxectivos deste plan están modernizar e adecuar o comercio polo miúdo co fin de mellorar o seu atractivo comercial e incorporar as tecnoloxías da información e comunicación aos pequenos comerciantes.

A deputada popular tamén sinalou que o dito plan servirá para fomentar a profesionalidade do sector, coordinando e impulsando políticas de formación, mellorará a rendibilidade empresarial a través da promoción e a creación de centrais de compras e fomentará o comercio de calidade.

Tamén no pleno do Parlamento desta mañá, foi rexeitada, cos votos do PP, unha iniciativa do PSdeG, apoiada polo BNG, pola que lle solicitaba á Xunta que desenvolvese cantas medidas fosen necesarias para apoiar, impulsar e favorecer a adquisición, por parte de cooperativas galegas, lideradas por Feiraco, da factoría que Pascual ten en Outeiro de Rei.

Na iniciativa, os socialistas pedíanlle ao Executivo galego que mostrase o seu apoio institucional, a súa participación económica e a súa implicación política nun proxecto que serviría para sentar as bases dun grupo lácteo galego, de modo que se garantiría a actividade da planta, o mantemento dos postos de traballo e a recollida do leite aos produtores.

Segundo indicou a deputada Sonia Verdes (PSdeG) durante o debate, o proxecto liderado por Feiraco coas cooperativas galegas é o "único sólido, fiable e viable" e criticou o Goberno galego por querer impedir o "casamento" da planta de Pascual cos "pretendentes" que ten.

"Queren amañar o seu casamento con outros", asegurou.