ARTEIXO

O Concello adquire unha nave en Sorrizo na que creará un centro de interpretación

Este edificio levaba 30 anos abandonado e era propiedade dunha empresa da Xunta - Arteixo creará unha senda litoral que partirá dende Sabón e chegará ata Caión

17.05.2016 | 02:13
Fachada da nave de Sorrizo.

O Concello de Arteixo acaba de formalizar a compra dunha nave abandonada na parroquia de Sorrizo co obxectivo de convertela nun centro polivalente municipal concibido como un espazo de interpretación e sensibilización da natureza na costa. O concelleiro de Servizos Económicos, José Baldomero, explica que o Concello adquiriu esta nave á empresa Sodiga (entidade participada pola Xunta) por un importe de 14.769 euros. Foi o concelleiro de Obras e Servizos Municipais, José Ramón Amado, o que acudiu o pasado venres ao notario en Santiago de Compostela para formalizar a compra. A responsable do departamento de Promoción Económica, Patricia Amado, sinala que o Concello pretende "recuperar o turismo mariñeiro".

Esta nave está nunha parcela moi próxima ao mar e dende a que se pode ver toda a costa de Arteixo dende o porto de Langosteira ata Sorrizo. Encóntrase en bo estado de conservación pese a que leva 30 anos totalmente abandonada. A maleza invade boa parte da fachada exterior e o interior está en bo estado. O edil de Servizos Económicos asegura que neste ano realizarase unha limpeza desta parcela. O Concello calcula que a rehabilitación desta nave para transformala nun centro de interpretación custará sobre 300.000 euros. O Concello solicitará colaboración técnica á Xunta para elaborar o proxecto do centro e o programa.

Esta actuación en Sorrizo irá acompañada pola prolongación da senda que recorre boa parte do litoral de Arteixo. O Concello habilitará unha nova dende Sabón ata Sorrizo (medirá 0,6 kilómetros) e fará unha nova dende este núcleo ata Caión (esta terá unha lonxitude de 3,2 kilómetros en total). Arteixo tamén pedirá unha axuda económica para crear esta nova senda litoral e rehabilitar o edificio.

O edil de Servizos Económicos, José Baldomero, destaca que esta nave leva 30 anos totalmente abandonada. Durante un par de anos, ná década dos 80, este foi un criadeiro de cétaceos. O concelleiro, que é veciño de Sorrizo, explica que foi "un proceso largo" localizar aos donos actuais do inmoble. "Puxémonos a averiguar. Acudín ao Rexistro Mercantil e ao da Propiedade", recorda.

Baldomero asegura que o Concello primeiro intentou que Sodiga cedese a nave, pero que ao final aceptaron vendela por 14.769 euros. "Agora xa está pagado e escriturado", indica. O edil afirma que empezou a investigar sobre a propiedade deste edificio abandonado tras as eleccións municipais do pasado ano. Este esforzo culminou o pasado venres coa formalización da venda do inmoble a favor do Concello de Arteixo.

Compartir en Twitter
Compartir en Facebook

ESPECIAL

PREMIOS OPINIÓN MÚSICA RAÍZ

Premios Opinión da Música de Raíz

Consulta aquí a información dos premios de música do noso diario


GALICIA EN VINOS

Galicia en Vinos

Todos los vinos de Galicia

Consulta aquí todos los vinos de las cinco denominaciones de origen de Galicia
 


esquelasfunerarias.es
Enlaces recomendados: Premios Cine