O portavoz do PP na Deputación, Agustín Hernández, demandou onte no pleno que o Goberno provincial non esixa aos concellos a tramitación telemática para a contratación dos proxectos do Plan Único, co obxectivo de axilizar o comezo das obras en cada municipio. Os populares lembran a súa abstención na aprobación duns pregos que, segundo Hernández, "complican o investimento dos fondos provinciais aos concellos máis pequenos e que contan con menos recursos da provincia". "Somos conscientes de que os pregos se adaptan á lei que obriga ás empresas presentar a súa proposta por medios electrónicos, pero esta lei non entra en vigor ata outubro deste ano", apuntou Hernández, e instou ao Goberno provincial a facilitar a licitación das obras sen usar as ferramentas electrónicas.
