A Xunta demanda estar no comité de crise do secuestro do ´Alakrana´

Feijóo advirte maior preocupación no Goberno e di que os efectos de traer a España aos dous piratas se sofren agora

EUROPA PRESS O presidente da Xunta, Alberto Núñez Feijóo, esixiu hoxe ao vicepresidente primeiro do Goberno, María Teresa Fernández de la Vega, que o Executivo galego estea presente e forme parte do comité de crise que creou o Goberno central para o seguimento do secuestro do 'Alakrana'. Agregou que teñen "dereito" e, ademais, deben dar a súa opinión antes de que se tomen máis decisións e coñecer a información de primeira man.

"Temos dereito e a obriga de dar a nosa opinión e a informar os cidadáns galegos de como están os seus familiares", aseverou Feijóo nunha rolda de prensa en Madrid convocada tras anunciar a anulación da viaxe oficial que tiña previsto emprender hoxe a Miami.

Feijóo explicou que recibirá unha resposta á súa petición "nos próximos días", pero que "non ten marcha atrás" porque oito galegos levan 34 días retidos e, ademais, agora corre risco a vida de dous deles --Antonio Manuel Pérez, natural de Boiro, e Joaquín Fernández, de Nigrán, que onte foron baixados do barco polos piratas--. "As comunidades autónomas tamén son Estado. Necesitamos estar para saber qué información hai, qué riscos corremos e qué alternativas se poden adoptar", subliñou.

Tamén manifestou que, aínda que el non ten coñecemento de ningún avance, si notou "unha maior preocupación do Goberno" que é quen ten toda a información e quen debe facer públicos os avances. Pediu que o Goberno sexa "máis transparente" co Executivo galego e coas familias.

Trasladou dende a Xunta o seu apoio e lealdade "incondicional" ao Goberno por enriba das "discrepancias puntuais" porque o obxectivo de ambas as dúas administracións é "un desenlace feliz", que sería a liberación dos mariñeiros españois.

AS FAMILIAS NECESITAN QUE VOLVAN TODOS E BEN

Fixo público o "desespero" das familias, que temen pola vida das persoas retidas e se atopan nunha situación "dramática". "O Goberno pediulles confianza, e eles déronlle a súa confianza ao Goberno, agora necesitan información, necesitan a noticia de que van volver á casa, de que van volver todos e de que van volver ben", remachou.

En relación coa conveniencia de traer a España aos dous piratas somalís capturados para que sexan xulgados, afirmou que "xa non ten volta atrás" pero que os efectos desa acción os "estamos a sufrir agora" aínda que reabrir o debate non sexa oportuno neste momento.

Ao seu xuízo, a Xustiza "debe acomodarse" á situación actual porque "non hai ningún ben xurídico superior á vida da tripulación do barco" e agora "non está en cuestión a soberanía de España" como nos casos de terrorismo. Engadiu que cando se libere as persoas secuestradas, xa poderán tomarse medidas contra os secuestradores.

O GOBERNO TEN QUE EXPLICAR

"A decisión de traelos a España e de que sexan xulgados é do Goberno, que eles expliquen. Nós xa dixemos que é moi arriscado, pero agora non caben discrepancias, senón un obxectivo, que é colaborar con prudencia e con cautela para que volvan á casa", apostilou.

Preguntado sobre a posibilidade de que se pague un rescate a cambio da liberdade dos pescadores retidos, asegurou que despois de que se pagase no secuestro do pesqueiro 'Praia de Bakio'', a pregunta "xa está contestada", especialmente cando este caso é máis grave.

Anunciou que a ministra de Medio Ambiente, Medio Rural y Marino, Elena Espinosa, acudirá hoxe a Galicia para reunirse coas familias dos pescadores secuestrados e, "se ela quere", algún membro da Xunta acompañaraa. Ademais, o presidente galego volverá hoxe a Galicia tras anular unha viaxe oficial que tiña previsto a Miami porque agora "ningún compromiso é superior a estar ao lado dos familiares".