"Se o Goberno quitase a apnea por saúde, tamén tería que prohibir o tabaco e o alcol"

- Que supón para o sector que se prohiba esta técnica?

-Nas praias que temos podemos ir con compresor e en apnea, como se foi toda a vida. Nalgunhas, nas que traballas a dous ou tres metros, non precisas ir co compresor. A lei di agora que nos vai quitar a apnea, aínda que polo momento non o fixo. Di [o Goberno] que é pola saúde, pero ata o de agora nunca tivemos problema ningún, non morreu ninguén; se fora pola saúde, tamén tería que quitar o tabaco e o alcol. Está en contra da prohibición todo o colectivo de mariscadores, e non só de Fisterra, tamén o de Corcubión, Muxía, Camariñas, Laxe, Ribeira, Aguiño...

- Cantos afectados hai pola posible prohibición en Fisterra?

-Os compañeiros mais eu empezamos hai uns 30 anos con apnea. Eramos uns 200 pescadores e agora somos 57 mergulladores na agrupación de Fisterra, pero tamén os hai en Corcubión, Muros, Ribeira? Todos vivimos disto; uns imos á navalla, outros ao longueirón. Eu ando co compresor, pero tamén en apnea, coa que traballamos ata os seis metros tranquilamente nalgunhas praias. Empezamos hai tres ou catro anos a andar co compresor. E que agora nos quiten a apnea? Esta xente que está nas oficinas debería vir falar con nós para poder explicarlles en que consiste.

- Que medidas de seguridade toman cando usan esta técnica?

-O plan de seguridade é igual para todas as confrarías. Eu teño un compresor a bordo. Somos tres, baixamos dous e queda un xefe de equipo arriba. Agrupámonos todas as lanchas que traballan na mesma praia e nunca hai ninguén só, sempre estamos varios. Hai un xefe de equipo que controla que non pase nada. Co compresor igual, tes un xefe de equipo arriba e dous abaixo, onde tes a botella de seguridade por se falla o compresor.

- Que condicións físicas se requiren para este traballo?

-Pasas o mesmo recoñecemento que para ir co compresor, cunha proba de esforzo, outra pulmonar...

- É preciso un barco de apoio?

-Quérennolo poñer, pero para que é esa embarcación se traballamos conxuntamente? Fan as leis e non saben o que fan, non falan con nós, que somos os que andamos en apnea. En Fisterra fomos pioneiros. Empezamos con carné, despois obrigáronnos a unha embarcación de terceira lista, agora co tema profesional? É un pau moi grande porque é un oficio de toda a vida e quérennolo quitar, pero imos facer o que sexa posible para evitalo.

- Ir en apnea implica riscos para a saúde?

-Con 51 anos teño baixado a sete, oito, nove e dez metros sen problema ningún. Paso dous recoñecementos ao ano como o resto dos mergulladores, un coa cartilla do mar e outro polo privado, que che esixen. Teño compañeiros que se xubilaron con 60 anos sen problemas. Aquí saías do colexio, comprabas un traxe de neopreno, unhas lentes, unhas aletas e xa ías. Un compresor custa 2.000 e pico euros, e despois os reguladores. En apnea, co teu carné, non precisas tanta inversión.

- O compresor supón unha inversión maior que a apnea...

-Si, claro, pero todos nós temos compresor, non é que o teñamos que comprar agora. Son dúas artes que se poden combinar. O noso carné antes poñía recolector en apnea e agora pon recolector de recursos específicos con técnicas de mergullo. Imos coas dúas técnicas, sempre co plan de seguridade que temos pola Marina Mercante.

- Que vantaxes ten a recollida por apnea?

-A burbulla do compresor provoca que o longueirón non saia tanto ou que marche, mentres que facéndoo en apnea baixas tranquilamente e aguantas un minuto ou máis para collelo.

- É máis fácil acceder aos recursos?

-Igual, porque as praias ás que imos son cristalinas, non hai rochas, e tanto baixas co compresor como en apnea.

- Longueirón e navalla son os recursos aos que máis afecta a medida?

-Claro, porque ao ourizo vas co compresor. E varías os dous. Eu estou traballando na zona de Corcubión, que hai máis navalla, e imos á praia de Fornelos, con dous ou tres metros e interesa máis ir en apnea. A partir de abril, que pecha alí, empezamos en Fisterra.

- Por que cre que a quere prohibir o Goberno?

-Eso é o que queremos saber nós. No verán vén xente en apnea porque lle gusta e a nós, que é un oficio de toda a vida, quérenola quitar porque aseguran que é malo para a saúde.

- En quen buscaron apoio?

-Nós non estamos de acordo con que se prohiba a extracción en apnea; nin nós nin outras confrarías. Somos socios do pósito de Fisterra e co patrón maior fixemos os escritos explicando como se traballa en apnea e a Federación Galega de Confrarías tamén enviou outro. A nivel persoal tamén se remitiu un documento explicando como se traballa para que [o Goberno] se dea conta [da importancia que ten].

- Recibiron apoio da Consellería do Mar?

-Esto ven de Fomento, non da Consellería do Mar, que sempre nos mandou o permex poñendo se é en apnea ou co compresor. Mar manda o plan de marisqueo todos os meses e este chegou o día 1 coma sempre.

- Cre que Fomento vai dar marcha atrás?

-Despois de todas as alegacións dos colectivos e das confrarías penso que imos poder seguir practicando a apnea porque [o Goberno] ten que darse conta de que se o queremos é por algo e que se fose malo para a saúde, non seguiríamos con isto. De momento traballamos en apnea e co compresor ata que nos digan se a prohiben ou non.