Si home si

Chámalle X

07.08.2016 | 03:02
Xosé Manuel Pereiro.

Ter goberno en Madrid non temos, pero polo menos resolvemos outra cuestión que traía de cabeza a España toda, e o neno de Fuenlabrada, fillo de Ignacio (aka Ñaco) e María poderase chamar Lobo. Unha vitoria da sociedade sobre a rixidez da administración, ata o punto de que Pablo Iglesias saíu do seu case mutismo estival para tuitear: "Está claro que no es la noticia más importante, pero es una buena noticia. Felicidades a la madre y al padre de Lobo", e enlaza a unha noticia na que se indica que o director xeral de Registros y Notariado "admite que los usos sociales han convertido este nombre en cada vez más habitual". En que quedamos? Se é habitual, porque non llo podían poñer os de Fuenlabrada?

A cuestión dos nomes é delicada, e a normativa española é claramente conservadora. De feito, non avanzou moito desde que tiña a exclusiva denominativa o santoral católico. Impide, por exemplo, poñer diminutivos ou apócopes, propios ou foráneos (Nano, Toño, Fede, Fer, Tom, Dick, Harry, Joe), e aínda hai pouco admitiu Lola. E nomes que causen risa ou menosprezo, o que é relativo. Milleiros de mulleres soportaron e aínda soportan patronímicos como Esclavitud, Tránsito, Regla, Angustias. Hoxe 7 de agosto é o día de, entre outros, dos santos Hormisda, Frambaldo, Arsacio ou Armagilo. Todos eles en desuso desde hai séculos, pero legais. Como Lope (Luis Alberto de Cuenca recordaba en ABC que o nome vén de "lobo" e del saíu o apelido López), Vasco, Suero, ou o resucitado Mencía (o nome, non a uva).

Hai uns cen anos deixou de usarse en España o patronímico Nilo porque un que se chamaba así foi autor dun asasinato particularmente odioso e atroz. Hai menos, lembro a queixa dun veciño de Riveira a quen o xuíz non lle deixaba rexistrar Lenin ao fillo, non en homenaxe ao revolucionario ruso, senón a un compañeiro de traballo seu en Venezuela que se chamaba así. O xuíz argumentaba que lle podía poñer Vladimiro, ou Ilich, pero Lenin era un mote.

Noutros países hai barra libre. Son famosos os nomes cubanos, pero a conta do neno ao que lle querían poñer Lobo, saíron nas redes sociais documentos de identidade como o dun colombiano que se chamaba Jesucristo Hitler Paracelso Montoya González, ou un chileno Shakespeare Mozart Armstrong Correa Pérez. E tamén que están empadroados (supoño que nacidos fóra) Supermán, Lady Di e Pamela Anderson, aínda que hai 612 Shakiras, 101 Neymars e uns 20 Messis, Iniestas e Maradonas que deben ser nativos. Ñaco, o pai de Lobo, di que ese nome daralle "carisma" (ao fillo) e que consultou varios especialistas que lle aseguraron que non lle vai supoñer problemas. Sen ser especialista, estou certo que menos que se lle chamase Frambaldo. O que pasa é os problemas non soamente están fóra. O que si din os expertos é que para un neno/nena, cantas menos expectativas poñanos pais/nais, mellor. E se lle pos Lobo parece que non vas quedar moi contento se che di que quere ser manicuro (ou si, quizais sexan prexuízos).

A normativa ten defectos. Entre eles, que hai que montar un circo para que a dirección xeral de Registros y Notariado se contradiga e admita un nome máis ou menos normal (digo máis ou menos porque, cando un nome de animal empeza a non selo?: Zorro?, Xabaril? Corzo? Cabalo?). Pero o maior é que dá todo o poder aos pais, eses seres aos que non se lles esixe ningún tipo de exame para traer nenos ao mundo. A reforma necesaria é que os rapaces se podan cambiar o nome aos 12-13 anos, para evitar Jesucristos Hitler, París de Noia, Panorama... claro que cos Pokémon, mesmo se enchen as aulas de Poliwhirl Vázquez, Charizar Regueiro ou Ivysaur Lema.

Compartir en Twitter
Compartir en Facebook
Enlaces recomendados: Premios Cine