A colección Putumayo publica un álbum de cancións do Nadal

O. L. | A CORUÑA Distribuído polo selo Karonte, a colección Putumayo edita un dos seus novos traballos, centrado nesta ocasión nas cancións de Nadal.

Once temas compoñen este álbum, no que atopamos a algúns artistas que teñen ligazóns coa música de raíz e que fan algúns dos mellores temas do disco.

Sam Bush é un dos renovadores do bluegrass e o seu talento fica plasmado na súa obra musical. Tocando a mandolina realiza aquí unha bonita versión instrumental de Sleigh Ride. Deana Carter é unha cantante country que aporta a peza Winter Wonderland a este traballo colectivo.

Outra presenza provén do mundo do folk británixco. Falamos da cantante inglesa Kate Rusby, que deixa a súa melodiosa voz nunha boa versión de Here we come A-wassailing. Outro que salienta é o cantautor Martin Sexton cunha excelente interpretación vocal en Holly Jolly Christmas. Tamén aportan algo creativo os compoñentes da banda Brave Combo con Jolly old St Nick e a proposta tinxida de blues dos The Christmas Jug Band coas voces de Angela Strehli e Maria Muldaur na interpretación de Boogie Woogie Santa Claus.