María del Mar Bonet, nomeada doutora honoris causa en Lleida

REDACCIÓN | A CORUÑA A Universitat de Lleida nomeou á cantautora mallorquina Maria del Mar Bonet doutora honoris causa en recoñecemento á súa traxectoria artística. Bonet comezou a cantar en 1967 con Els Setze Jutges e foise convertindo nun referente do panorama musical catalán.

Ademais de popularizar as cancións tradicionais das Illas Baleares e os versos de poetas baleares e cataláns, Bonet colaborou con artistas como Alan Stivell, Milton Nascimento, Zülfü Livaneli, George Moustaki, Jackson Browne, Miguel Poveda e os seus paisanos Ovidi Montllor e Lluís Llach.

Bonet ten premios como a Creu de Sant Jordi (1984), o Premio Nacional de Música da Generalitat de Cataluña (1992), o Ramon Llull (1999) e a Medalla de Honor outorgada polo Parlamento de Cataluña no ano 2007.