Boa acollida en Feáns para a proposta de hortas urbanas

O próximo xoves, no Forum Metropolitano, o colectivo de arquitectos "Desescribir" convoca unha nova reunión na que se presentará esta iniciativa ás 19:30

REDACCIÓN WEB O pasado sábado, 21 de Novembro, o colectivo Desescribir mantivo unha reunión informativa coas veciñas e veciños de Feáns no seu Centro Cívico para explicar a iniciativa "hortas na cidade dos barrios".

O colectivo de arquitectos animou aos veciños a ceder os seus terreos para configurar o banco de terras que sirva como base. Algúns veciños mostraron as súas dúbidas sobre temas de tipo legal así como respecto aos sistemas de xestión, pero en xeral a acollida da proposta foi positiva e xa se conta con varios veciños interesados en participar da iniciativa. A idea é propor mecanismos de xestión para que propietarios de terras na actualidade sen uso as podan ceder ou alugar a persoas de calquera zona da cidade, que carecen de terreos, e estean interesadas en traballalas como hortas e cultivos. Deste xeito preténdense explorar alternativas de futuro para as áreas rurais de A Coruña.

O próximo xoves día 26 de novembro ás 19:30 está convocada unha nova reunión no Fórum Metropolitano, na que se presentará esta iniciativa, Hortas na cidade dos barrios, a tódalas persoas da cidade interesadas en participar na mesma.

Durante a fin de semana do venres 27 ó sábado 28 de Novembro festexarase o inicio dos traballos de recuperación dalgúns dos terreos mediante a celebración dunha merenda comunitaria.

Esta actividade, coordinada polo colectivo de arquitectos "Desescribir", é o cuarto obradoiro dentro da iniciativa "A Cidade dos Barrios", que está impulsada pola Delegación de A Coruña do Colexio Oficial de Arquitectos de Galicia e dirixe o estudio de arquitectura MMASA.