CARMEN VILLAR. SANTA COMBA.
Nin en Santiago, nin na Coruña nin en Vigo. Santa Comba. Manuel Rivas (ou O´Rivas, como asina no seu último libro) escolleu esta vila para presentar onte a súa Os Grouchos, un libro de artigos xornalisticos. A razón: plantexamento "ecolóxico" da cultura no que avoga pola "descentralización".
No seu intre puxo de moda o lapis do carpinteiro e agora leva na man unha ferramenta tamén moi do oficio: un nivel: "O nivel -explica- para min sempre foi unha ferramenta máxica, é coma o ollo do xornalista. O xornalista ten que procurar recompoñer o que está feito cachizas. Iso segue sendo importante no xornalismo, porque no mundo de hoxe vese todo moi desfiañado. Coma se non houbese causas e efectos. Eu penso que unha das funcións nosas é concluír a costura desas cachizas e establecer sobre todo unha relación de causas-efectos. Malia tódalas dificultades que hai e os condicionamentos, en conxunto vaise cumprindo esa misión fundamental. A peor mentira é o silencio".
"Aínda que haxa unha deformación dunha noticia ou unha versión interesada, polo menos propicia que non fique en silencio. O que é terrible é a invisibilidade e o silencio, por iso escollín a portada dun cadro de Castelao que está en América. Para min equivale aos Fusilamentos do 3 de maio ou ao Gernika. Eses rapaces significan que o xornalismo ten que loitar contra dúas constantes nefastas, dous problemas que se deron moito na nosa historia: o que non se pode ver e o que non se pode dicir. Hai un título dos Desastres da guerra de Goya que se titula No se puede mirar de tan terrible".
Rivas pronúnciase sobre literatura e xornalismo: "Considero que hai diferencias pero máis que nada teñen que ver co valor. Para min o importante é a mirada, e a mirada do xornalista e do escritor teñen que coincidir nesa necesidade de dar a ver".
"Penso ademais -engade-que é un momento bo o que estamos a vivir en Galicia no xornalismo de opinión. Non só nos medios máis convencionais, senón tamén nas radios e tamén nos blogs, é moi interesante. Para min equivale moito ao momento que se viviu do abrente romántico en prensa. Un dos obxectivos do libro é cuestionar a idea de Galicia esquinada", conclue Manuel Rivas.
