A Universidade da Coruña apoia a crítica da Academia pola nova política lingüística

AXENCIAS / REDACCIÓN | SANTIAGO / A CORUÑA "Compartimos absolutamente o manifesto da Real Academia, que vén a expresar dun modo simple e sintético o que dende a Universidade da Coruña vimos dicindo sempre, e suscribimos o lema final de que o galego non é problema, é unha solución", afirmou o vicerreitor de Cultura e Comunicación da Universidade da Coruña en alusión ó manifesto que o pasado martes presentou a Real Academia Galega.

Xosé Ramón Barreiro, presidente da Real Academia Galega (RAG), deu lectura na sede da institución que preside na Coruña a unha parte do manifesto do seu plenario sobre o idioma, no que mostra a súa preocupación porque "as primeiras decisións lingüísticas anunciadas pola Xunta sexan todas desprotectoras coa lingua galega". Ao recollido no manifesto, o presidente da Academia engadiu onte que "no tema do idioma estamos vendo que a mocidade se retrae do uso do galego. Iso lévanos a moi distintas formulacións. Unha cousa é a explicación e outra a corrección desta situación. No que atinxe á corrección, o que hai que facer é levar a cabo un proceso de concienciación da sociedade" e concluiu: "Todos estamos implicados".

O secretario xeral do PSdeG, Manuel Vázquez, apuntou onte que o presidente da Xunta, Alberto Núñez Feijóo, xogou ao xerar polémica co idioma galego, polo que agora debe "cadrar o círculo da demagoxia co da lei, a ver como o fai". A preguntas dos xornalistas por este asunto, Manuel Vázquez apuntou que o que se lle debe pedir a un presidente nun país bilingüe, no que "non se pode segregar por razón de lingua", é que non diga no Parlamento que "cada un fale castelán cando queira".

A xuízo de Vázquez, os cidadáns teñen dereito a falar o idioma que prefiran, pero no Parlamento, "sancta sanctorum da política galega, dicirlles aos parlamentarios que falen castelán é un fito que non fixo ninguén", apuntou. "Coincido coa Real Academia: meteron o noso idioma nun aperto" posto que non xerou nunca problemas, "nin con Fraga", mentres Núñez Feijóo "está conseguindo o que non conseguiu ninguén: un tema que non era debate" convertelo nunha polémica.

"Ten que cadrar o círculo da demagoxia co da lei e a ver como o fai" apuntou Vázquez, que tamén lle reprochou ao presidente que diga que agora "non pode ser" que se reforme o decreto do galego no ensino, cando o prometera, e preguntouse se o fará o ano que vén. Ademais, Vázquez informou de que respecta "enormemente" a cooficialidade das dúas linguas, pero as autoridades teñen a obriga, dixo, de incentivar o uso do galego. No asunto da lingua, xogou -o presidente da Xunta- "e ten a todo o mundo un pouco sorprendido", concluíu.