O PROXECTO PIONEIRO, FINANCIADO EN PARTE POLA XUNTA, PRESENTASE HOXE NO SALÓN DO CÓMIC
MAR MATO
Mar Mato.Vigo
Un xogo de ambientación castrexa nunha Galicia mítica onde vilas como Vigo, A Coruña, Santiago ou Ourense mudan de nome. Unha serie de aventuras con heroes, orcos e inimigos mesturadas en batallas e buscas de tesouros. As crónicas de Gáidil son todo o anterior e, por se non fora abondo, o primeiro xogo de rol en galego. Unha proposta da editorial Difusora de Letras que chegará ás librarías a finais de setembro ou principios de outubro.
Henrique Torreiro, editor do libro, fala das coidadas ilustracións da obra -medio cento das que mostramos algunhas nesta páxina- a cargo de Víctor Rivas, un ilustrador galego de sona. Torreiro fala tamén dos escritores das aventuras, "dous mestres de inglés de Primaria", Nacho Rodríguez Domínguez e Pablo Fernández Otero.
Ámbolos dous levan "anos pulindo o xogo", explica o editor quen lembra que "xa tiñan intentado facer dous xogos de rol antes pero só este o levaron ata o final. Non só tiveron que elaboralo senón xogar partidas e partidas para ver se as cousas ían ben".
Facer realidade un soño non só precisou de ideas senón tamén de cartos postos pola editorial así como pola Dirección Xeral de
Xuventude.
Torreiro engade que "quizais Crónicas de Gáidil abra unha moda e faga que máis empresas se interesen polos xogos de rol".
"Pareceunos unha iniciativa moi interesante; cremos que hai que ter un capítulo lúdico na vida. Os xogos de rol son unha parte no mundo editorial galego non moi cultivada. O rol ten tópicos como cando sae nos medios ás veces por noticias escabrosas. Sen embargo, é un xogo que pode ser máis positivo", explica Torreiro.
Autores e editor agardan a presentación do xogo hoxe en A Coruña no Salón do Cómic Viñetas desde o Atlántico que se desenvolverá ata o vindeiro sábado.
