As rúas de Santiago volverán a encherse hoxe de pancartas e lemas reivindicativos a favor do galego, durante a multitudinaria manifestación en defensa do idioma convocada pola plataforma Queremos galego. Este colectivo, integrado por 447 entidades e encabezado por A Mesa pola Normalización Lingüística, acusa á Xunta de querer reducir a presenza do galego en ámbitos coma o ensino, o comercio ou mesmo a propia Administración. Non é o único. Outras plataformas, coma Galego, patrimonio da humanidade, Prolingua ou Cambia Galicia tamén mostran o seu rexeitamento á política lingüística do Goberno autonómico

MARÍA DE LA HUERTA | A CORUÑA A política lingüística que o PP ven aplicando dende a súa chegada á Xunta, hai apenas seis meses, segue a levantar polvareda entre os defensores do galego. Ao incesante goteo de novos colectivos a favor do idioma unirase, esta mañá, a celebración, en Santiago (12.00 horas, Alameda), dunha multitudinaria manifestación convocada, precisamente, por unha desas novas plataformas, Queremos galego, pero á que tamén teñen confirmada a súa asistencia os literatos Avelino Pousa Antelo, Teresa Moure, Manuel Rivas e Bernardino Braña; o teólogo Andrés Torres Queiruga; a gaiteira Susana Seivane ou o dramaturgo Manuel Lourenzo, entre outros persoeiros.

. Queremos galego. Queremos Galego é a plataforma convocante da manifestación de hoxe en Santiago e, tamén, a máis numerosa, pois engloba a 447 entidades sociais e máis de 3.000 persoas baixo o denominador común de esixir ás institucións públicas que non tomen medidas "que desprotexan ou reduzan a presenza do galego en ningún ámbito". O colectivo, no que participan A Mesa pola Normalización Lingüística, a CIG, o BNG, Esquerda Unida, o Sindicato Labrego Galego, a Asociación de Escritores en Lingua Galega ou fundacións coma Castelao e Pedrón de Ouro, entre outras, constituiuse formalmente o pasado 14 de xullo. O seu portavoz e vicepresidente de A Mesa, Fran Rei, lembra que Galicia ten "unha lingua propia, orixinaria, sinal de identidade colectiva, patrimonio inmaterial e irrepetible" e afirma que a maioría da sociedade "quere protexela e normalizala, con independencia da súa ideoloxía individual". Na mesma liña, o director da revista Retranca, Kiko da Silva, reclama o "dereito a loitar para que o galego non desapareza" e lamenta que as viñetas de Castelao sobre caciques e perseguidores do idioma "estean de actualidade". "Se perdemos o humor galego perderemos un xeito de entender o mundo que é único", considera Da Silva, quen ademáis anima a "vivir en galego na era das novas tecnoloxías" e chama a se manifestar "non só pola defensa do idioma, senón por acadar unha sociedade tolerante". "É preocupante que, por cuestións que van máis alá do significado dunha lingua, un Governo teña prexuizos", conclúe.

. Galego, patrimonio da humanidade. Esta plataforma, que tamén conta co respaldo de persoeiros de diferentes ámbitos da sociedade galega, coma os deputados do PSdeG Francisco Cerviño e Xaquín Fernández Leiceaga, a ex conselleira de Educación Laura Sánchez Piñón, o escritor Suso de Toro, os sindicalistas Antonio García e Ricardo Torres de UGT ou Jesús Penedo de CCOO, reuniu máis de 5.000 apoios dende a súa creación, o pasado mes de xuño. A iniciativa -que o vindeiro 14 de novembro celebrará "un acto de reflexión en defensa do galego" en Santiago-, aboga pola "restauración do consenso" e a "defensa do marco normativo dos últimos 26 anos", segundo explica un dos seus portavoces, Agustín Bahamonde, quen atribúe a "ofensiva contra o idioma" da Xunta a unha intención do presidente galego, Alberto Núñez Feijóo, por "agradar a Madrid". "É ben sabido por todos que o señor Núñez Feijóo ten aspiracións fóra de Galicia para ascender no PP", sinala. Pola súa banda, outro dos simpatizantes de Galego, patrimonio da humanidade, Henrique Monteagudo, enmarca a plataforma "fóra de calquera afán exclusivista ou de monopolio da defensa do idioma" e pide que a manifestación de hoxe sexa "unha expresión de toda a pluralidade" que hai na sociedade. Monteagudo tamén critica o "conflito" creado arredor das linguas que xenera "dúas Galicias en pararelo", e lamenta a dobre moral da Xunta e de Galicia Bilingüe, ás que acusa de "esgrimir o bilingüismo e o dereito a decidir" mentres defenden "o monolingüismo en castelán" e aplican ese dereito "só para algunhas cousas".

. Prolingua. É un dos últimos colectivos constituídos para a defensa do galego. Definido como "apartidario" e "plural", os seus obxectivos pasan pola consecución da oficialidade real do galego e a súa normalización en ámbitos ata agora excluídos coma a empresa, a xustiza ou os medios de comunicación. Arredor de mil persoas asinaron xa o seu manifesto fundacional, que se pode suscribir a través da páxina web da plataforma -www.prolinguagalega.org--. O único requisito para pertencer ao grupo é o compromiso coa lingua galega e a defensa da súas utilización tanto no eido público coma no privado. "A lingua galega é o máis prezado patrimonio inmaterial do pobo galego. É o único que nos identifica co que somos, galegos e galegas, e o que nos dá lugar neste mundo", resalta o manifesto, que conta co respaldo de persoeiros de ideoloxías tan dispares coma Xosé Manuel Beiras, Camilo Nogueira ou Rafael Cuíña, fillo do ex deputado, conselleiro e secretario xeral de PP de Galicia Xosé Cuíña. "Hai grupos de presión contra o idioma coma Galicia Bilingüe, que eu considero antigaleguistas, que o están a atacar", subliña Cuíña, quen afirma que Prolingua pretende erixirse "en favor do galego e non en contra de ninguén". Aínda que, polo momento, non ten ningunha acción concreta perfilada, a plataforma tamén asistirá hoxe á manifestación de Santiago e, máis adiante, convocará os seus propios actos reivindicativos en favor do idioma.

. Cambia Galicia. Este colectivo, promovido pola Asociación de Escritores en Lingua Galega, quere desmontar os prexuizos existentes en torno ao idioma de Galicia "e facer agromar un sentido de orgullo polo propio de forma creativa", explican os seus responsables. Para levar a cabo este obxectivo, utilizan ferramentas coma o diálogo, o teatro na rúa ou a música. De feito, os pasados días 18,19 e 20 de setembro, a plataforma organizou unha curiosa iniciativa para defender o galego, consistente nunha marcha entre os municipios de Ribadeo e Mondoñedo, en Lugo, "falando coas persoas de forma informal e tamén de xeito máis organizado, nas vilas do camiño". Outra das actividades que barallan de cara ao futuro consiste "na convocatoria dun pequeno concurso enfocado, sobre todo, á mocidade, no que durante 30 segundos terán que dar ideas sobre a importancia do galego e sobre cómo e por qué defender o idioma", explican.