Acusa á Xunta de levar a cabo unha "política de destrución do galego" coa axuda medios de comunicación coma 'El Mundo', 'La Razón' ou a COPE e organizacións coma Galicia Bilingüe, a quen califica de "grupúsculo" e de quen di que "está a intentar que a lingua desapareza". A filóloga e ex deputada do BNG Pilar García Negro considera, ademais, que o galego precisa "máis visibilidade e non tanta homenaxe" e invita aos "compatriotas" a traballar unidos para levar o idioma "a todos os ámbitos sociais"

M. DE LA HUERTA | A CORUÑA A profesora da Universidade da Coruña e ex deputada do BNG Pilar García Negro (Lugo, 1953) vén de coordinar dous libros, Da fala e a lingua, un proceso inacabado e Sobre o racismo lingüístico (Edicións Laivento), nos que se inclúen análises sobre prexuízos e lexitimidade linguística de recoñecidos filólogos coma Manuel Ferreiro Fernández, Xosé Ramón Freixeiro Mato, Xosé Manuel Sánchez Rei ou Goretti Sanmartín Rei. García Negro, que hoxe participará na manifestación convocada en Santiago en defensa do idioma, califica de "fitogolpista" ao actual Goberno da Xunta porque "busca desmantelar unha lei, a de normalización lingüística, que ten xa 26 anos de vida, cando a súa obriga é acatala e facela acatar", sinala.

-Sobre o racismo lingüístico é un título, canto menos, contundente.

-O que pretendemos neste libro é desvelar as razóns non confesadas, mais si reais, do racismo lingüístico, non por grandilocuencia, senón porque se adecúa ás prácticas de exclusión totalitaria que pretende levar a cabo a Xunta co galego, e rebelarnos contra esa realidade. O racismo é unha forma de discriminación, consistente en inferiorizar, ocultar e dominar un elemento considerado prescindible, neste caso, o idioma. Detrás destes escuros intereses agóchase todo un aparello político e mediático, encabezado polas cavernas do PP, pero do que tamén forman parte medios nacionais coma El Mundo, ABC, La Razón ou a COPE, fundacións coma a FAES (Fundación para el Análisis y los Estudios Sociales) ou grupúsculos coma Galicia Bilingüe, entre outros.

-Galicia Bilingüe é, de entre todos eses colectivos, un dos que está a acadar maior notoriedade nos últimos tempos. De feito, a pasada semana, a presidenta desta entidade, Gloria Lago, asegurou que a manifestación que se celebra hoxe en Santiago é unha marcha pola imposición, e non en defensa do galego. Que lle parecen as súas verbas?

-A perversión fundamental deste grupúsculo consiste en utilizar o termo bilingüísmo, referido ao uso habitual de dúas linguas, cando o que quere facer é que unha delas desapareza, reducíndoa a usos puntuais e coloquiais. Falar de imposición do galego sería como dicir, a nivel mundial, que o conxunto da poboación negra ten asoballada á poboación branca colonizadora, ou que as mulleres lle están a quitar os postos de traballo aos homes. En Galicia, o único que está sobreimposto, por múltiples vías, é o idioma oficial do Estado.

-Por que están a insistir tanto, entón, nesa mensaxe?

-Para inducir temor nunha poboación colonizada e cunha confusión lingüística moi atroz. O galego ten unha presenza pública aínda mínima grazas a unha política endogámica que, durante décadas, non aplicou a súa propia lexislación. Un exemplo claro de todo isto é o que está a acontecer na cidade de A Coruña co tema do topónimo. Como é posible que se estea a discutir a lexitimidade dunha ley, a de normalización lingüística, que ten xa 26 años de vida? La Coruña é un híbrido -como tamén o son La Zapateira ou La Sardiñeira-, vergoñento, ilegal e de puro analfabetismo.

-Neste senso, cre que aínda existe un certo complexo de inferioridade por parte dos galegofalantes?

-Si, pero non é algo racional ou conxénito, senón que se trata dun sentimento inducido políticamente. Se dende os primeiros meses de vida os bebés van asimilando coma algo habitual que o galego estea relegado aos usos tópicos ou coloquiais, é fácilmente esperable que os galegofalantes asuman a secundarización do idioma, porque non teñen imaxes prestixiosas do mesmo.

-Dende que chegou o PP ao Goberno da Xunta, hai seis meses, téñense formado, polo menos, catro grandes novas plataformas en defensa do galego. Que lectura fai vostede disto?

-Que moitas persoas e organizacións galegas son quen de percibir o inxustificado e perverso atentado contra o galego que están a perpetrar os que teñen a obriga superior de defendelo. É sumamente positivo que xordan tantos movementos a prol da defensa do idioma, sempre e cando non exclúan ao que históricamente xa existiu porque o ideal, aínda que sone metafórico, é que tódolos afluentes dun río conflúan na mesma corrente.

-No seo dun deses colectivos, Prolingua, conviven ideoloxías tan dispares coma as do PP, o PSOE e o BNG. De feito, un dos rostros visibles da plataforma é o de Rafael Cuíña, fillo do ex deputado, conselleiro e secretario xeral de PP galego Xosé Cuíña.

-Coido que nas filas do PP non debe haber unanimidade a propósito desa política de destrución do galego que está a levar a cabo o partido, tanto dende a dirección xeral de Madrid coma, por suposto, dende a Xunta.

-Facendo un pouco de autocrítica, que cre que deben mellorar os colectivos en defensa do galego para que a súa mensaxe cale máis fondo na sociedad?

-O galego precisa máis visibilidade e non tanta homenaxe. Non se pode reducir a lingua a un obxecto cultural ou a un mecanismo de lucro. Os compatriotas debemos traballar unidos para levar o noso idioma a tódolos ámbitos sociais. Pregúntanos o xuíz en que idioma queremos ser xulgados? Ofrécennos os xornais a posibilidade de publicar unha esquela en galego? Cómpre que todos sexamos animadores da normalidade lingüística.