Unhas 50.000 persoas protestan en Santiago contra os ´ataques´ da Xunta ao galego

X. A. TABOADA | SANTIAGO A plataforma Queremos galego mostrou onte polas rúas de Santiago a contestación social coa que conta a política lingüística da Xunta. Unhas 50.000 persoas -case o dobre segundo a organización-, mobilizáronse contra o que consideran un ataque ao idioma galego por parte do goberno do PP, plasmado en medidas como a derogación do decreto que regula o galego no ensino, a consulta aos pais sobre o idioma, a supresión de axudas para a tradución de libros e a reforma da Lei de Función Pública que suprimiu a obrigatoriedade de facer un exame en galego nas oposicións.

Detrás desta "marea humana", como así lle chamaron, está unha plataforma respaldada por máis de 500 entidades de todo tipo e 3.000 particulares, pero tamén os sindicatos e os dous partidos da oposición, o PSOE e o BNG, que estiveron representados polos seus máximos dirixentes. Ate estivo o ministro de Xustiza, Francisco Caamaño. "Identifícome plenamente con Galicia e co que estou facendo. Defender a lingua dos meus avós, dos meus pais e a miña, porque tamén quero que sexa a dos meus fillos", dixo o ministro, que non dubidou en sinalar ao presidente da Xunta, Alberto Núñez Feijóo, coma o "principal perigo do galego".

Foi tanta a xente que acudiu que fixo pequena á manifestación convocada no Día das Letras Galegas, na que participaron unhas 20.000 persoas, e obrigou a repetir o acto final de lectura dos manifestos para que entraran todos os participantes. Nin un paso atrás, Aprender en galego non é un delito ou Polo dereito a vivir en galego foron algunhas das consignas cantadas durante todo o percorrido e os lemas das numerosas pancartas. Os únicos incidentes producíronse cando un grupo de participantes tirou globos con pintura contra as lunas e os caixeiros automáticos de diversas entidades bancarias, que quedaron varias horas inutilizados.

No centro de todas as críticas estiveron o PP e a Xunta, aos que acusan de invalidar "medidas positivas" de promoción do galego e recortar dereitos. Fran Rei, coordinador de Queremos galego, a actriz Patricia Vázquez, Avelino Pousa Antelo ós seus 95 anos, Carlos Callón -presidente de A Mesa- e o polifacético Xurxo Souto foron os responsables de porlle voz ás reinvidicación dos milleiros de personas que ateigaron Santiago. Sobre todo, queren que o Goberno dea marcha atrás na súa política e recupere os logros acadados durante toda a etapa democrática porque, dixeron, por "primeira vez" unha Administración non só non defende a lingua propia, senon que a ataca.

Calificativos como "arrogante", "chulo" ou "prepotente" foron adicados a Feijóo. "Este ataque pode ser un motivo para o reverdecer do noso idioma como o Prestige significou na defensa da costa", bramou Callón.

O presidente da Mesa pola Normalización Lingüística cre que a pesares da mobilización, Feijóo vai seguir "xordo". "Pero un presidente serio e responsable debe aplicar o consenso e as leis, que é o que defendemos aquí", dixo, para quen o Goberno non só está instalado na "galegofobia" senón que ademais practica o "racismo lingüístico".

"Que treman os arrecastados e que treman eses que pensan que poden dispor da lingua como queiran. Se os galegos somos galegos é por obra e gracia da nosa lingua", soltou Pousa Antelo ante unha praza da Quintana abarrotada.

"¡Fóra preguiza! Cómpre dar un paso adiante porque esta é una gran causa política e non partidista", espetou o coruñés Xurxo Souto.