Entre 70 e 80% dos galegos toma a iniciativa ante un problema legal, xa sexa en materia de consumo, vivenda ou laboral, mentres que a media española oscila de 60 a 80%

EFE Os cidadáns galegos son máis activos ca o resto dos españois cando se lles presenta un problema legal, segundo se desprende dun estudo elaborado polo Colexio Oficial de Politólogos e Sociólogos de Cataluña por encarga da compañía de asistencia xurídica Arag.

Entre 70 e 80 por cento dos galegos toma a iniciativa ante un problema legal, xa sexa en materia de consumo, vivenda ou laboral, mentres que a media española oscila de 60 a 80 por cento, en función do caso de que se trate, indicou a directora de comunicación de Arag, Virginia Tusell, na presentación do informe.

A crise económica é unha das razóns que explica a mudanza de actitude da cidadanía, e é que, segundo dixo Tusell, "hai dous anos case ninguén reclamaba por unha factura de 50 ou 60 euros e agora faise habitualmente".

Onde máis se produciu un aumento nas consultas xurídicas é no ámbito laboral, aínda que en termos globais España continúa a estar a unha gran distancia doutros países do ámbito comunitario como por exemplo Alemaña, onde unha de cada dúas familias ten contratado un servizo de asistencia xurídica.

Os galegos adoitan reclamar con maior asiduidade en cuestións relacionadas co consumo, e é que a metade das persoas enquisadas na elaboración do informe declarou que tivo un problema neste ámbito.

Aínda así, Galicia está por debaixo da media española neste tipo de reclamacións, así como nas relacionadas coa vivenda, pero, polo contrario, é máis prolífica en cuestións fiscais, laborais e sanitarias.

Un 19 por cento dos enquisados afirmou que tivo problemas co sistema sanitario público ou privado, cinco puntos por riba do resto de españois.

O estudo elaborado polo Colexio Oficial de Politólogos e Sociólogos de Cataluña indica que aínda que a actitude da cidadanía ante os problemas xurídicos mudou continúa a haber un alto índice de desorientación legal, o que redunda na efectividade das reclamacións.

53,6 por cento dos galegos non sabería a quen dirixirse e só en 16,3 por cento dos casos relacionados con cuestións de consumo actúa de forma eficaz. Esa porcentaxe aumenta de forma considerábel no ámbito da vivenda.

O estudo de Arag detectou unha reticencia xeneralizada á contratación dun avogado pola percepción dos cidadáns de ter debidamente protexidos os seus dereitos mediante o sistema legal e por entender que pedir os servizos dun avogado vai acompañado con levar un preito aos tribunais.

Virginia Tusell indicou que esta impresión "é enganosa" e lembrou que a maioría dos conflitos se resolve "pola vía rápida", sen a necesidade de ir a xuízo.

Outro dos puntos analizados no estudo é a repercusión dos problemas xurídicos na vida cotiá, e dedúcese que aos galegos lles afecta en menor medida que ao resto dos españois, e, porén, provoca maior número de baixas laborais, ao igual que en Canarias, País Vasco e Aragón.

O perfil medio da persoa que reclama ante un problema xurídico é un home de entre 25 e 49 anos, laboralmente activo, cun alto nivel de formación e de ingresos.

Para a elaboración do terceiro informe de Arag realizáronse 4.400 entrevistas telefónicas cunha duración media de quince minutos a persoas maiores de dezaoito anos.