Gonzalo Hermo Poeta e filólogo

"Non hai que ter nostalxia do pasado nin medo aos cambios"

O Ministerio de Cultura outorga o Premio Nacional de Poesía Joven ao rianxeiro Gonzalo Hermo por unha obra en galego

21.10.2015 | 00:53
O poeta e filólogo Gonzalo Hermo.

O Premio Nacional de Poesía Joven Miguel Hernández, do Ministerio de Cultura, leva este ano o nome do rianxeiro Gonzalo Hermo (1987), pola súa obra en galego Celebración, editada por Apiario. O xurado destacou do poemario "a aposta por abrir novos camiños para a expresión poética", "a linguaxe arriscada e innovadora".

-Sorpréndame, como lle notificaron que gañara o premio, vía teléfono, e-mail ou WhatsApp?

-Entereime por unha chamada perdida dun número raro. Marquei e era o secretario de Estado. Deume algo de impresión. Non acabo aínda de crelo. Sigo en estado de shock.

-Xa entrando en materia, vostede, de cativo, tiña a arela de ser mestre ou poeta?

-Non o tiña moi claro. Non sei se quixen ser poeta, como profesión. Sabía que non se podía vivir disto, inda que con este premio vaime caer unha cantidade importante de diñeiro.

-Como foron as súas orixes literarias, como creador?

-Empecei bastante novo a escribir. Lía a Rosalía de Castro de adolescente e impactoume. Cando empece a escribir poesía facía de forma tímida, ninguén o sabía. Era un secreto, como se escribise un diario. Ao chegar á universidade, coincidín con poetas e xa o dei a coñecer.

-Que lectura de Rosalía foi a que o engaiolou?

-Sen dúbida, Follas Novas. O que sentía Rosalía conectaba con esa angustia adolescente que eu tiña. Sentía que Rosalía me falaba ao oído.

-Disfruta sendo profesor?

-Empecei en setembro deste ano. É bastante duro. Poñerte diante de 40 ou 50 persoas a falar é duro pero enriquecedor. Teño un contrato de doutoramento co Instituto da Lingua Galega (ILGA) de Santiago e estou dando docencia na Facultade de Filoloxía. Dou moitas clases, de Literatura, Lingua...

-Fáleme un pouco do seu doutoramento, cal é a liña das pesquisa?

-A tese trata de editar un libro medieval en galego que está na Catedral de Santiago. É un libro de tenzas, de propiedades. Está escrito en galego e tamén en latín. A nivel lingüístico é interesante e tamén é importante pola onomástica. Hai vilas que aparecen por primeira vez rexistradas. Quero dicir que é o rexistro máis antigo editado que se coñece dos nomes dalgúns lugares. A directora da miña tese é ana Boullón e foi a partir dela que atopei este códice.

-A editorial resalta do libro gañador, Celebración, que "ensaia un tipo de escrita antinostálxica que renega da ruína". Cal foi o embrión do proxecto?

-É un libro que foi escrito nunha etapa de crise vital, un tempo no que tiña presente a idea de cambio. Intenta ser poemario optimista. Penso que nas etapas vitais non hai que ter medo dos cambios nin ter nostalxia polo pasado.

-Algunha xente prefire ter sempre o ollo e a memoria no pasado e no pesimismo. Vostede propón todo o contrario.

-É complicado pero é a actitude vital que hai que ter. Eu son unha persoa con mala memoria. Olvido tanto as cousas boas como as malas. Calquera tempo pasado foi peor.

-Que diagnóstico realiza vostede da saúde poeta galega?

-A literatura gallega brilla na poesía dende o Medievo. O sector editorial, hoxe en día, non dá resposta a toda creatividade que hai. Isto está relacionado coas poucas vendas. En canto ós lectores, a poesía interesa a pouca xente pero a esa xente interésalle moito.

-Voulle plantexar algo hipotético. Imaxine que hai un incendio que ameaza tódalas obras poéticas. Dígame tres que salvaría.

-(Silencio reflexivo) Non sabería que dicir. Os Cancioneiros medievais galego-portugueses, sen dúbida. Despois, algo de Shakespeare habería que salvar. E tamén as obras de Dante.

-E en galego?

-Os Cancioneiros medievais, as obras de Rosalía de Castro e a Cunqueiro.

-Agora, algo máis terrenal, sabe que vai facer cos cartos do premio?

-Comprar un coche, que é algo que quería ter. Tamén farei unha festa cos amigos. O que quede, vou gardalo porque o futuro é incerto. Teño contrato ata 2017. Despois, o abismo. Non hai trazas de que continúe dando clase. As cousas están fatal.

Compartir en Twitter
Compartir en Facebook

Javier de Toro, jefe del servicio de reumatología del Complejo Hospitalario Universitario de A Coruña, responderá a preguntas de los lectores este jueves a las 11.30

 

Lotería del Niño 2017

Comprobar Lotería del Niño

Toda la información de la Lotería del Niño. Comprueba los números premiados con nuestro widget de la Lotería del Niño.

 
Widget Lotería del Niño

Llévate a tu web, a tu escritorio o a tu iGoogle los resultados de lotería de Navidad y de la lotería del niño. Descárgatelo

 
Enlaces recomendados: Premios Cine