Leccións para triunfar fóra da aula

Uns 300 alumnos de varios centros coruñeses participan no CIFP de Someso nunha nova actividade do proxecto 'A Coruña emprende'

13.01.2016 | 18:39
Leccións para triunfar fóra da aula

Preto de 300 alumnos de varios centros de ensinanza de A Coruña e a súa área metropolitana participaron onte no CIFP Someso nunha nova charla enmarcada no proxecto A Coruña emprende, que busca estimular as capacidades de emprendemento entre os mozos e preparalos para o futuro mercado laboral unha vez saian das aulas. A actividade de onte, na que os estudantes participaron activamente, forma parte dese programa, unha iniciativa promovida de maneira conxunta pola Consellería de Cultura, Educación e Ordenación Universitaria, a Fundación Alcoa e LA OPINIÓN, que pretende transmitir e fomentar a cultura emprendedora desde idades temperás desenvolvendo unha serie de actividades de sensibilización e formación entre os alumnos da comarca coruñesa.

A boa acollida da primeira edición deste programa constátase nos centros participantes, posto que volven a repetir os quince do curso pasado. A iniciativa -que entronca co Plan de Emprendemento no Sistema Educativo de Galicia Eduemprende, posto en marcha pola Consellería- achegará a realidade empresarial e o espírito emprendedor a nove IES ou CPI (un por cada concello da comarca); tres CEIP, que coinciden cos municipios de maior poboación; e tres CIFP, que contan con viveiro de empresas.

Por segundo ano consecutivo, participan o IES de Viós (Abegondo), o IES de Sabón (Arteixo), o CPI Cruz do Sar (Bergondo), o IES Alfonso X O Sabio (Cambre) o CPI Vicente Otero Valcárcel (Carral), o IES Fernando Wirtz Suárez (A Coruña), o IES Universidade Laboral (Culleredo) , o IES María Casares (Oleiros) e o IES Isaac Díaz Pardo (Sada).

En canto aos tres CEIP, trátase do CEIP Ponte dos Brozos en Arteixo, o CEIP Eusebio da Guarda na Coruña e o CEIP A Rabadeira de Oleiros. Pola súa banda, os Centros Integrados de Formación Profesional con viveiro de empresas son o CIFP Someso, o CIFP Ánxel Casal-Monte Alto e o CIFP Paseo das Pontes, ámbolos tres situados na cidade coruñesa.

O programa abrangue, en total, a máis de 30 docentes e máis de 500 alumnos de sexto curso de Educación Primaria, de todos os cursos de Educación Secundaria Obrigatoria, Bacharelato e Formación Profesional. Tanto o alumnado como o profesorado participarán en diversas actividades de formación, tales como xornadas de motivación como a de onte no IES Universidade Laboral de Culleredo, ou charlas e obradoiros sobre o proceso creativo, o marketing online, a translación da idea ao mercado ou a aplicación das TIC neste eido.

Toda esta información serviralle aos participantes para levar a cabo o seu proxecto final, que variará segundo o nivel do alumnado. Os mozos de 6º de Primaria e de 1º e 2º de ESO realizarán unha redacción dunha idea de negocio. Os estudantes que estean a cursar 3º e 4º de ESO elaborarán un pequeno proxecto de empresa e, por último, os alumnos de Bacharelato e Formación Profesional (FP) levarán a cabo un proxecto empresarial.

Compartir en Twitter
Compartir en Facebook

Lotería del Niño 2017

Comprobar Lotería del Niño

Toda la información de la Lotería del Niño. Comprueba los números premiados con nuestro widget de la Lotería del Niño.

 
Widget Lotería del Niño

Llévate a tu web, a tu escritorio o a tu iGoogle los resultados de lotería de Navidad y de la lotería del niño. Descárgatelo

 
Enlaces recomendados: Premios Cine