Saleta Goi, viúva de Manuel María, continúa defendendo a día de hoxe a importancia da lingua e de que a sociedade tome conciencia á hora de salvagardar o futuro do patrimonio inmaterial de Galicia, tal e como ela e o homenaxeado este ano nas Letras Galegas demostraron ao longo da súa vida en común, a súa acción na clandestinidade e o seu traballo a favor da difusión cultural. Un dos fitos máis destacados desta traxectoria materializouse na libraría Xistral que ambos os dous fundaron en Monforte de Lemos a finais dos 60, e que se consagrou como referencia para a distribución de literatura escrita en lingua galega e único punto da localidade no que se podían adquirir pezas de Cerámica Sargadelos.

"Traballouse moito, sendo galega -a libraría- totalmente. No 70, o letreiro en galego, e as rapazas que contratabamos tiñan que falar en galego. E non pasou nada, era a que máis vendeu de Monforte", destacou Saleta Goi, nunha entrevista concedida a Europa Press. Nesta liña, defendeu que "ata nos negocios é importante ter personalidade, e o galego a dá". "Os rapaces do instituto dicían 'imos á libraría dos galegos".

En contraposición a este traballo e á defensa do idioma de Manuel María sitúase a situación actual do galego, que Saleta Goi considera que está "un pouco peor que hai tempo atrás". "Se os gobernos fomentan o idioma, a xente fala máis galego", considerou.