Nove concertos percorrerán o patrimonio histórico de Galicia no festival Espazos Sonoros

Do 3 de setembro ao 18 de outubro en varios espazos singulares do patrimonio galego

21.07.2016 | 00:55
Anxo Lorenzo (segundo pola dereita) na presentación do programa de Espazos Sonoros, onte, en Santiago.

O festival Espazos Sonoros 2016 celebra do 3 de setembro ao 18 de outubro a súa novena edición cun programa de nove concertos en espazos singulares do patrimonio galego. A música, a arquitectura e a paisaxe volven ser os protagonistas deste ciclo promovido pola Consellería de Cultura e Educación e que este ano propón un achegamento a edificacións históricas dos concellos da Coruña, Bergondo, Vimianzo, Ribadavia, A Guarda, Pedrafita do Cebreiro, Lalín, Monterrei, Palas de Rei e Baiona, a través dunha programación musical que tamén inclúe andainas, visitas guiadas e obradoiros.

A igrexa de San Salvador de Vilar de Donas, en Palas de Rei; o castelo de Santa Cruz, na Guarda; o pazo de Liñares, en Lalín; Santa María a Real do Cebreiro e o castelo de Monterrei son algúns dos espazos patrimoniais, civís e relixiosos nos que se poderán escoitar agrupacións galegas e internacionais de estilos e procedencias diversas, como o Ensemble Gilles Binchois, Le Miroir de Musique, La Xácara, Tres Pesos, Solo Voces con Adrián Regueiro na rolda pola paisaxe dos órganos históricos ou a pianista Paula Ríos, encargada de recuperar a obra para piano de Rosa García Ascot e Xesús Bal y Gay.

"Con esta iniciativa -explicou Anxo Lorenzo- pretendemos unir dous aspectos fundamentais no traballo do noso departamento: a aposta por crear espazos para esas outras músicas con menor presenza, pero de alta calidade, e a difusión do patrimonio cultural, aínda ás veces enormemente descoñecido pola poboación". Segundo precisou, "o feito de coñecelo nunha experiencia próxima a través da música parécenos unha forma moi axeitada de crear vínculos emocionais con ese espazo patrimonial e unha maneira de vivilo con intensidade".

Son numerosos os seguidores e as seguidoras de Espazos Sonoros que, ano tras ano, percorren o territorio galego á descuberta do patrimonio, nunha programación que arrancará na recta final do verán e que contará con espectáculos únicos, como o concerto que ofrecerá o Ensemble Gilles Binchois na igrexa de Santa María de Baiona o 8 de outubro. Este grupo de referencia da música antiga interpretará por primeira vez en Galicia un dos monumentos da historia da música, a Misa de Nosa Señora, unha peza do século XIV composta por Guillaume de Machaut para a catedral de Notre-Dame de Reims, en Francia

Rutas a pé polo patrimonio

Con motivo do concerto inaugural, o 3 de setembro, Espazos Sonoros propón unha primeira andaina pola contorna da igrexa de Santiago de Cereixo, en Vimianzo, a carón do río Grande. O día 10 dese mesmo mes, previamente ao concerto de Tres Pesos, o ciclo bota a andar polo roteiro fluvial de Ribadavia a Francelos, a través dunha paraxe de gran riqueza etnolóxica, natural e paisaxística.

No marco da irmandade musical entre Galicia e Portugal, o 11 de setembro o ciclo ofrecerá unha xornada no Baixo Miño que transcorrerá entre viñas -arredor da paisaxe vitivinícola dunha das subzonas da denominación de orixe Rías Baixas- e fortes, co desprazamento ata o castelo de Santa Cruz da Guarda.

Compartir en Twitter
Compartir en Facebook

Lotería del Niño 2017

Comprobar Lotería del Niño

Toda la información de la Lotería del Niño. Comprueba los números premiados con nuestro widget de la Lotería del Niño.

 
Widget Lotería del Niño

Llévate a tu web, a tu escritorio o a tu iGoogle los resultados de lotería de Navidad y de la lotería del niño. Descárgatelo

 
Enlaces recomendados: Premios Cine