'Pescadores de historias' visitará hoxe a localidade coruñesa de Camelle

O programa da TVG amosará o día a día dos mariñeiros e mergulladores da vila, que teñen nas rochas percebeiras a súa segunda casa

17.09.2017 | 02:26
X. H. Rivadulla Corcón, cun grupo de percebeiros de Camelle.

Pódese dicir que practicamente toda a costa galega é percebeira, pero hai zonas que destacan no mapa percebeiro de Galicia. Un destes lugares é o litoral que abarca a confraría de pescadores de Camelle. Aquí, como verán hoxe os espectadores do programa Pescadores de Historias, homes e mulleres extraen un percebe de primeira calidade e fano tendo como únicas armas de traballo e defensa contra o mar unha rasqueta e o seu propio corpo.

Figura singular en Camelle é Manuel Tajes O Rubio, co que o programa comezará a visita. Mariñeiro e mergullador de toda a vida, agora xa retirado, tamén foi percebeiro e explicará como se collía coa técnica do espello e a gadaña. O que significa o percebe para esta confraría contarao a vicepatroa Digna Romar, a primeira muller que se dedicou a este crustáceo no porto de Camelle.

Percebeiros intrépidos e sabios a pesar da súa xuventude son Cristian Martínez e Daniel Tedín, rapaces novos que se atreven máis ca ninguén nesta costa e que van ás pedras máis arriscadas.

A raíña das rochas percebeiras é Marisol Bouzas, coa que tamén falará o presentador do programa, Xosé H. Rivadulla Corcón. Muller singular, pasa da bravura necesaria para estar nas pedras do percebe á tenrura dunha persoa aberta á vida, sinxela e espontánea. A memoria histórica do percebe desta costa gárdaa Luz Divina, que, con máis de 80 anos, seguiría apañando se o corpo llo permitise.

'No bico un cantar'

Por outra banda, o programa musical No bico un cantar, que en cada entrega se centra nunha canción moi coñecida da música galega e realiza unha viaxe á nosa historia a través da música, con opinións de expertos, entrevistas a pé de rúa, documentación audiovisual de arquivo e todos os elementos necesarios para contar a lenda de cada tema, achegarase esta noite á Rianxeira.

Esta peza considerada por moitos o himno non oficial de Galicia é unha canción da que se gravaron máis dun cento de versións distintas, que soa en todas as celebracións e da que semella que non hai nada novo por descubrir. Pero No bico un cantar desvelará a transcendencia da súa historia, ligada á emigración galega e á figura de Castelao; saberá quen é a rianxeira a quen está dedicada, e explicará por que unha melodía tan sinxela se converteu nun dos maiores éxitos da música galega.

No bico un cantar está dirixido por Senén Bernárdez, presentado por Arturo Fernández, e o seu equipo está composto por gran parte do equipo de profesionais que fixeron posible o premiado programa Alalá da TVG.

Compartir en Twitter
Compartir en Facebook

Lotería del Niño 2017

Comprobar Lotería del Niño

Toda la información de la Lotería del Niño. Comprueba los números premiados con nuestro widget de la Lotería del Niño.

 
Widget Lotería del Niño

Llévate a tu web, a tu escritorio o a tu iGoogle los resultados de lotería de Navidad y de la lotería del niño. Descárgatelo

 
Enlaces recomendados: Premios Cine