Un total de 100 centros educativos de ESO, bacharelato, FP ou ensinanzas de réxime especial da provincia da Coruña poñerán en marcha este curso os clubs de lectura, espazos de dinamización a prol da lectura que favorecen tamén a aprendizaxe de competencias clave. Prevese que participen ao redor de 5.000 lectores e lectoras nos club de lectura dos centros coruñeses.

A Consellería de Cultura, Educación e Ordenación Universitaria concede axudas para sufragar os gastos do desenvolvemento de actividades previstas para o club, sobre todo a adquisición de libros, que pasarán a formar parte dos fondos da biblioteca escolar. Para esta acción , a Consellería destinou 215.000 euros.

En total, son 231 os centros galegos que desenvolverán este curso clubs de lectura, nos que se prevé que participen máis de 12.000 lectoras e lectores. Á hora de realizar as asignacións aos centros valoráronse as iniciativas destinadas a impulsar a lectura de textos en lingua galega e que buscan contribuír a un maior vínculo dos mozos coa lingua e a literatura galegas. Tamén se primarán as que fomentan a participación nos grupos de lectura de varóns, co fin de contrarrestar os estereotipos de xénero nesta materia. E valoráronse de forma especial as propostas que impulsen a participación do alumnado con necesidades específicas de apoio educativo.

Os clubs de lectura funcionan como grupos de dinamización a prol da lectura nas comunidades educativas e como ámbitos de aprendizaxe de competencias clave para a vida.