28 de octubre de 2017
28.10.2017
DESCUBRE FDS

Do quiosco ás aulas, en branquiazul

O proxecto 'Os Nosos Valores-Escolas 110% Branquiazuis' nace da colaboración do Deportivo e LA OPINIÓN, que traslada a filosofía do seu coleccionable aos mais pequenos. Valores do deporte e historia do club danse a man

29.10.2017 | 22:04

De estar cada domingo no quiosco a visitar cada semana as aulas dos colexios de Primaria da Coruña. LA OPINIÓN súmase ao proxecto Os Nosos Valores do Deportivo para acompañar, reforzar e tamén trasladar a filosofía do seu coleccionable histórico, 110% Blanquiazul, aos rapaces de once e doce anos da cidade. Compañerismo, igualdade de xénero, capacidade de superación... Esas cualidades e moitas máis, todas elas intrínsecas ao mundo do deporte e facilmente identificables no día a día e na idiosincrasia do deportivismo, seguirán estando e serán parte importante desta iniciativa educativa. Tamén continuarán visitando os xogadores e xogadoras do club as aulas para que os máis pequenos lles trasladen as súas inquedanzas e compartan momentos de felicidade. Pero este ano haberá máis. Un paso cara adiante.

Da colaboración entre o Dépor e LA OPINIÓN e co patrocinio de Vegalsa-Eroski, o proxecto Os Nosos Valores-Escolas 110% Branquiazuis nace como unha experiencia integral de deportivismo para os máis pequenos. Do quiosco ás aulas e da escola a Riazor. Todos os colexios de Primaria da Coruña poderán apuntarse a esta actividade até o martes 31 de outubro no 981 217 400. Estará dirixida a alumnos de sexto curso e ofrece unha charla na que, ademais de coñecer os valores do deporte, os rapaces poderán saber de maneira amena e con ferramentas audiovisuais un pouco máis da historia do Dépor, de como era o fútbol hai algunhas décadas e da pegada do club na cidade na que viven. Os máis pequenos serán os protagonistas nunha iniciativa por e para eles que culminará o mesmo día da charla no centro educativo coa visita dun xogador ou xogadora do Deportivo e unhas datas máis adiante coa viaxe de todos os nenos xuntos ao estadio de Riazor para asistir a un partido do primeiro equipo masculino. Formación e diversión danse a man nunha actividade na que os valores do deporte e a rica historia da entidade, intimamente ligada á da súa cidade, estarán sempre moi presentes. Os rapaces, ademais, poderán participar antes e despois da conversa en concursos, un deles de redacción, no que plasmarán parte do aprendido nas charlas coas pinceladas históricas, as visitas dos xogadores ou a impactante experiencia de Riazor ou simplemente contarán o que lles suxire o Deportivo.

O mesmo modelo

Tras un traballo de máis de dous anos de investigación e dixitalización do Arquivo de Pachy Dopico, LA OPINIÓN lanzou en setembro de 2016 un coleccionable histórico do Dépor chamado 110% Blanquiazul co que quería sumarse ás festividades polo 110 aniversario do club. Naquela data, tamén coa colaboración da entidade da plaza de Pontevedra, invitou a todo o deportivismo aos baixos de Riazor como símbolo do produto que acababa de presentar. Era unha historia plural, moderna, viva, da xente e contada polas súas propias voces e parte desa filosofía é a que quere facer chegar agora ás aulas da cidade. E faino porque esa tamén é a forma de ser do Dépor, que naceu hai once décadas no corazón do barrio de Pescadería como un club modesto, popular, inquedo, orgulloso e atlántico e que continúa a ser así. Non hai nada nesta península que una máis a coruñeses de tan diversas condicións. O Dépor e LA OPINIÓN queren que ese sentimento e a semente do deportivismo xerminen nos máis pequenos.

Os responsables do coleccionable 110% Blanquiazul serán tamén as persoas que leven o peso das charlas e das visitas aos colexios en Os Nosos Valores-Escolas 110% Branquiazuis. Deste xeito, queda asegurado o selo do proxecto e da parte educativa desta iniciativa. Van a falar de novo os propios protagonistas. Lucas Pérez, Dagoberto Moll, Celso Borges, Manuel Pablo, Estefi... E moitos máis, todos aqueles que sintan o Deportivo. Xa sexan avós ou nenos de once ou doce anos.

Compartir en Twitter
Compartir en Facebook

GALICIA EN VINOS

Galicia en Vinos

Todos los vinos de Galicia

Consulta aquí todos los vinos de las cinco denominaciones de origen de Galicia
 


ESPECIAL

PREMIOS OPINIÓN MÚSICA RAÍZ

Premios Opinión da Música de Raíz

Consulta aquí a información dos premios de música do noso diario