Barcón di que a petición de megavatios de Emalcsa busca mellorar a vida dos coruñeses e non "facer negocio"

A concelleira de Urbanismo do Concello de A Coruña, Mar Barcón, xustificou hoxe a presentación do recurso contra a resolución do concurso eólico por parte da empresa municipal de augas, Emalcsa, xa que a petición de 6 megavatios feita por este organismo -e rexeitada pola Xunta-- "é para mellorar a vida dos coruñeses e non para facer negocio".

En declaracións aos medios antes de participar nun acto sectorial sobre Economía, Emprego e Territorio que o PSdeG celebrou hoxe en Vigo, Barcón recordou que a empresa municipal de augas solicitou esa potencia para dar servizo á nova depuradora da cidade, da que tamén se beneficiarán outras áreas da bisbarra.

Nese sentido, confirmou a presentación do recurso, habida conta de que, segundo afirmou, "a consellería dera noticias alentadoras" sobre unha posible concesión, e explicou que se pedirá a Industria "a reconsideración da súa negativa". "Para Emelcsa é unha cuestión de servizo público, non participou no concurso para facer negocio nin cun obxectivo de enriquecemento", concluíu.