O Chuac estará finalizado en 2013 cun investimento de case 244 millóns

Así o destacou hoxe, na súa intervención, o máximo mandatario do Goberno galego, quen subliñou a inclusión neste Plan Director do novo edificio destinado ao Instituto de Investigación Biomédica, que estará situado no Hospital Teresa Herrera, dun centro de alta resolución en Carballo e de outro de especialidades en Betanzos.

Touriño enmarcou esta actuación nas iniciativas postas en marcha polo Executivo galego para "mellorar" a asistencia sanitaria o cidadán e ofrecer unha "atención integral". Pola súa parte, a conselleira de Sanidade, María José Rubio, asegurou que o Plan Director pretende "adiantarse ás necesidades do mañá" e afirmou que un dos obxectivos é "humanizar a atención sanitaria".

Carencias

Tanto a conselleira como o xerente do Chuac, José García Buitrón, atribuíron a redefinición do Plan á necesidade de resolver algunhas "carencias" que presentaba para a súa execución.

Así, Rubio manifestou que non era posible executar as fases pendentes "porque carecía dunha planificación seria" e afirmou que as actuais modificacións permitirán converter ao hospital coruñés nun dos "máis avanzados" en investigación, formación e alta tecnoloxía.

Pola súa banda, Buitrón asegurou que en 2013 o hospital coruñés "disporá de máis camas, pero sobre todo de mellores espazos" para quirófanos, para o diagnóstico e para as urxencias".

Novas áreas

O Plan Director prevé a intervención nunha superficie de 165.486 metros cadrados, que inclúen xa os 44.000 metros do novo edificio inaugurado en decembro de 2005. Así, este ano está prevista a intervención na área de consultas externas, no banco de sangue ou a posta en marcha do novo servizo de farmacia.

O futuro complexo hospitalario pasará de 1.410 camas de hospitalización a 1.471 e terá un 70 por cento máis de consultas externas. A nova área de urxencias, que estará en funcionamento en 2010 no primeiro piso do edificio do hospital, cuadriplicará a súa dotación.

En 2011 está prevista a entrada en funcionamento do novo bloque cirúrxico e o novo edificio administrativo. Así mesmo, en 2012, segundo as previsións do Plan Director, estará operativa a nova área docente. A reforma da área de radioloxía é outra das actuacións previstas ata 2013, ano no que se abrirá o novo hotel de pacientes.