27 de diciembre de 2015
27.12.2015
Ricardo García Mira Deputado electo polo PSOE

"Con 16 anos, no soto de Moncho Valcarce, facía o activismo social que nos permitían"

27.12.2015 | 00:32
Ricardo García Mira.

Ricardo García Mira ten claro que a política non se fai só desde os escanos do Congreso ou do pleno municipal, que hai tamén un activismo na rúa que dá experiencia. O profesor García Mira foi elexido polos seus veciños para representar á Coruña no Congreso dos Deputados, unha tarefa que asegura que emprende "con moita ilusión".

É a primeira vez que ostenta un cargo de representación, aínda que se considera activista desde os "16 anos" cando se reunía con outros compañeiros no soto de Moncho Valcarce, o Cura das Encrobas. "Alí revolviámoslle a biblioteca e faciamos activismo social, o que se nos permitía, porque era o ano 1971", recorda García Mira, que participou no deseño dos procedementos democráticos da Universidade de Santiago.

Sobre o escenario que deixan as eleccións xerais, asegura que "vai precisar moito diálogo" e que o panorama é todo o contrario a "depresivo". Se fai unha lectura dos resultados -a perda de máis de 60 escanos no PP, de 20 do PSOE e a entrada con forza de Podemos e Ciudadanos- di que esta nova etapa vai precisar de "moita negociación, que non é malo". A súa posición cambiará tanto se o Partido Popular consegue formar Goberno como se non o fai, xa que abriría a posibilidade de que fose o PSOE o que se puxese á fronte. Dun xeito ou doutro, ten claro que defenderá os sectores estratéxicos e produtivos da provincia así como o remate de "determinadas infraestruturas".

"Estamos nun mundo moderno no que as decisións xa non se toman de arriba a abaixo, a cidadanía está pedindo que o sistema de decisión ten que mudar", explica, e asegura que o PP non lle pode "dar as costas" a esta afirmación que entende que saíu das urnas.

Defende ao sector do cerco e asegura que o leiteiro non pode vender o leite a un prezo "tan cativo" e que se estea a importar leite facendo que se afunda "o tecido produtivo local". Avoga por "protexer aos emprendedores" que investiron para levar adiante as súas explotacións e que, agora, se senten "traizoados" polas administracións.

"Primeiro, temos que esperar a que se garanta a estabilidade do país, do Goberno e, despois, proceder a traballar nestas cuestións, que son as que fan país. Pertencer á Unión Europea non pode significar só estar no euro", explica García Mira, que espera traballar co Concello e coa Xunta no tema do financiamento do porto exterior.

"O primeiro é a transparencia, a xente ten que saber que se está a facer nos peiraos", explica García Mira, que cre que se ten que constituír unha mesa de traballo na que haxa representantes do mundo empresarial, veciños e administracións para coñecer a realidade da situación e que "beneficios económicos trae esa venda". Así que, avoga pola transparencia.

Compartir en Twitter
Compartir en Facebook

GALICIA EN VINOS

Galicia en Vinos

Todos los vinos de Galicia

Consulta aquí todos los vinos de las cinco denominaciones de origen de Galicia
 


esquelasfunerarias.es
Enlaces recomendados: Premios Cine